Kena jaket pengelikun nyadika peneleba: Liwan

0

Pekara tu patut dikemeratka kelebih agi tetiap maya bekenaka perengka pengangkut sungai

SIBU: Semua orang tambang ti ngena perengka pengangkut sungai sekalika bot ekspres, bot laju tauka perau panjai dilalau ngambika seruran ngena jaket pengelikun ungkup pengelikun sida empu.

Menteri Muda Perengka Pengangkut Sungai enggau Pengelikun, Liwan Lagang madah, pengawa ngena jaket pengelikun patut nyadi seiti ari pengawa ke patut tauka dikemeran maya ngena perengka pengangkut sungai.

“Ba aku, jaket opengelikun tu enda tau enda dikena. Anang ngasaika kita ulih nyemerai kitai enda ngena nya. Tiap kali ngena perengka pengangkut sungai kitai patut nelebaka pengawa ngena jaket pengelikun tu.”

Tetiap kali ngena perengka pengangkut sungai kitai patut nelebaka diri ngena jaket pengelikun tu,” ku iya lebuhka dikerandau kemari.

Kaban Kunsil Nengeri (ADUN) Belaga mansutka jaku tu lebuhka ditanya bekaul enggau pengawa ngena jaket pengelikun maya nepan perau panjai, berindik ari tiga penusah ke nyadi di Miri, Song enggau Bintangor.

Dalam penusah bedau lama ke udah, dua iku nembiak sekula institut pelajar tinggi peranak ari  Nigeria lemas lalu tiga iku ke bukai lenyau, dua iku ari sida tu nembiak mit, dalam tiga bengkah penusah karam ti bebida.

“Bot tu enda direjister enggau Kunsil Sungai-Sungai Sarawak (LSS). Aku udah nyemetak madah ngagai LSS iya nya pekara ti beguna endar diatu, alai mayuh orang tambang deka nepan bot nyengkaum bot ekspres nyentukka ba kemisi Krismas enda lama agi.

“Aku berunding kitai patut terit agi ngasuh orang tambang ngena jaket pengelikun. Tambah mega, kitai nadai napi sebarang pengerugi lebuh ngena jaket pengelikun tu, tang nyangka tau nyelamatka nyawa maya penusah enda disadang nyadi,” ku iya nerang.

Liwan mega madah, penerit adat LSS deka matau gaya ba semua palan penyangkai orang tambang dikena nyaga pengelikun mensia mayuh ti deka mulaika diri maya kemisi sekula enggau kemisi Krismas.

Iya mega madah, LSS mega bekerejasama enggau ejensi penerit adat ke bukai, kelimpah ngelalau semua orang ti ngempu bot meri kerejasama sida.

“Tebal agi penusah ke nyadi kandang beberapa hari tu ngaul bot orang ngatika diri tauka bot mit, alai kitai nadai kuasa ngagai sida,” ku Liwan.