GAGA ATI: Bala graduan IPG Kampus Samarahan berami laban udah teulihka pemujur ba pelajar lalu deka berengkah gawa nyadi pengajar.
Begunaka teknologi penyambung baka wi-fi ngambika nembiak jampat landik sereta bepenemu nitihka ubah pemansang dunya
KOTA SAMARAHAN: Bala pengajar ngembuan tanggung pengawa ke besai lebuh ngajar bala nembiak sekula kemaya hari tu kelebih agi lebuh beratika mayuh macham ubah ke nyadi ba institut alai belajar ngajar, endur bala pengajar teulihka peneleba ke baru laban deka nyendiaka sida iya lebuh gawa nyadi pengajar jemah ila.
Kepala Menteri, Pehin Sri Abdul Taib Mahmud madah patut bisi chara ke manah agi kena ngajar bala nembiak kitai, bechuntoka teknik chara ngajar ke manah agi ngambika bala nembiak deka teulihka penguntung ari chara ajar pengajar enggau nyentuk agi.
“Diatu kitai betapi ba pekara penyambung enggau teknologi, iya nya kitai ngembuan siti sistem penyambung ke jampat sereta mungkur mayuh macham perengka kena belajar, jaku lalau enggau perengka bukai ke nguntungka bala nembiak enggau anak kitai,” ku iya.
Iya madah baka tu lebuh bejadika atur pengawa Konvokesyen begulai Institut Pendidikan Guru (IPG) Kampus Tun Abdul Razak ke-12 semak ditu, kemari.
Ku iya, kediatu pan enti diperatika bendar, agi bisi tikas digital ke besai entara teknik sereta perengka guna ke dikena bala nembiak kitai belajar ba mengeri enggau ba menua pesisir.
“Pekara tu benung lalu ulih diputarka kitai. Kitai ba Sarawak, udah ngambi pemutus deka mungkur tiap sukut menua tu enggau perengka penyambung wi-fi nyengkaum ba sitak menua pesisir, ngambika kitai enda ibuh nganti pemutus ari sektor swasta ngasuh sida datai kitu.
“Kitai pan nemu, baka sektor swasta nyangka ngasaika nadai penguntung ba pengawa ngemansangka sitak wi-fi ba menua pesisir laban gaya tanah bukit, nadai entu mayuh pengguna….Orang pan enggai kia,” ku iya.
Nya alai, ku Taib, Perintah Menua Sarawak dalam kandang 5 taun tu ke udah, mutus ngambika wi-fi mungkur nyengkaum ba menua pesisir enggau mengeri, lalu semina enda ibuh ngaga ba sitak ke bebukit enggau sekeda sitak ba menua pesisir.
“Tau disemaka pengawa kitai tu udah mujur. Ukai semina nya aja, kitai pan mutus deka mantu bala pengajar kitai ngena sistem teknologi wi-fi iya nya teknologi ke manah nengah siti sistem ke digaga kitai empu kena ngajar bala nembiak,” ku iya.
Ku Taib baru, sitak pelilih menua Mukah udah dipilih nyadi pelilih menua ke ngena sistem tu lalu dikarap enti sistem tu manah, nyangka iya deka dikerembai ngagai serata menua pesisir.
“Tu gaya bantu perintah menua nyukung pengawa pelajar, iya nya tanggung pengawa nyamin bala nembiak ba menua pesisir ngambika enda kena tinggal pemansang,” ku iya.
Ku iya, enti kitai ulih ngena internet lalu ngaga siti teknik chara ngajar ke manah, mayuh utai dipelajar ulih digaga lalu dibantai enggau chara ke muntang agi….Nembiak pan jampat agi mereti, ku iya.
Perintah Besai ku Taib, udah nguji ngemansangka sistem pelajar ba renggat pra-sekula laban dikearap semina enggau chara ngemansangka sistem pra-sekula tu ulih ngenyampatka agi proses belajar ba entara anak mit.
Kelimpah ari nya, ku Taib, pengawa pengajar patut diperati sereta dikemeratka ngembuan siti juluk ke berat ngagai menua tu.
“Ba aku, bala pengajar iya nya orang ke chukup beguna laban nyendiaka pemansang pelajar nembiak jemah ila, ba pengawa pemansang ekonomi ke umbas iya suba tang diatu nyadi ekonomi ke ngembuan penatai pemisi ke besai,” ku iya.
Lebuh ditanya naka ni bungkur wi-fi ba menua tu udah, ku Taib: “Penyerekai wi-fi dalam menua tu ditaga bisi urung tiga suku benung dipejalaika dalam menua tu, taja pan ba sekeda sitak, wi-fi enda ulih mungkur sitak ke bebukit tang semina sitak bepantai enggau semua palan ke landai,” ku iya.
Sama bisi nguluka atur pengawa nya kemari, Tuai Opis Akademik IPG KPK ke ngarika Rektor IPG, Opis Menteri Pelajar Malaysia, Tuai Opis IPG Kampus Sarawak, Miri, Nuri Udin.
Urung 420 iku bala nembiak (ke deka nyadi pengajar) nyadi graduan Kursus Pengajian Lepasan Ijazah (KPLI) kemari.