KUCHING: Perintah angkun nentuka raban orang dagang pemakai ngaul diri dalam industri halal dunya ti nyendiaka makit sepenyampau RM6.9 triliun setaun.
Sapit Menteri Pemansang Menua Pesisir enggau Kandang Menua Datuk Joseph Entulu Belaun pechaya Malaysia ulih nyadi palan pemansang industri halal dunya ketegal ti ngembuan penau enggau pengelandik netapka setipikit halal.
Ku iya, pinta pemakai halal ba serata dunya udah nambah ketegal penyampau orang ti megai pengarap Islam majak mayuh ke manggai 1.8 biliun iku.
“Manggai ba taun 2030, 27 persin ari penyampau mensia di dunya megai pengarap Islam.
“Tu ngujungka pinta ngagai produk sereta pemakai halal deka majak nambah. Makit tu mega nyengkaum menua China, India enggau Eropah,” ku iya.
Iya mansutka jaku tu ba pengerami bejadika Halal Park Mara enggau KimFest Demak Laut ditu, kemari.
Dikena ngemujurka juluk perintah nya, Entulu madahka program latih halal deka disedia ngagai raban orang dagang pia mega ngaduka program pemansang dagang kelimpah ari dikena ngangkatka palan Mara nyadi palan pemansut produk halal.
“Semua program tu diperambu ngambika orang dagang ngembuan penegap deka besemekih dalam makit dunya lalu ngemansutka produk halal nyapai tikas ti ditetapka,” ku iya.
Perintah numbuhka Halal Industry Development Cooporation (HDC) dalam taun 2008 enggau tuju matau sereta ngemansang industri halal.
Entulu mega madah, penyampau eksport produk halal ba taun 2011 udah ngerikut RM35.4 biliun enti dibandingka enggau RM23.1 biliun ba taun 2010.
Tiga buah palan halal udah dipenyadika dulu agi ari tu iya nya di Tambun Perak, Pengkalan Chepa Kelantan enggau Arau Perlis.
Ba kaul ke sama., Sapit Speaker Dewan Rakyat Datuk Dr. Wan Junaidi Tuanku Jaafar ke bela datai ngansak orang dagang sereta rayat bukai ngerebut awak dagang dalam indusri halal ti ngembuan makit ti chukup besai tu.
Ku iya, nengah bantu ari Mara sereta nengah atur dagang ti dipejalaika enggau manah, iya pechaya orang dagang industri halal Sarawak deka teulihka pemujur.