KUCHING: Panglima Satu Divisyen Leftenan Jeneral Datuk Mohd Zaki Mokhtar deka mansik baru atur ke baru bekaul enggau penumbuh Platun Media dalam Angkatan Tentera Malaysia (ATM).
Iya madah sebedau tu sigi bisi atur numbuhka palan tu tang iya bedau ditumbuhka baruh Satu Divisyen.
“Aku enda entu ingat pemisi platun media di Kuala Lumpur enti iya bisi tauka nadai tang enti bisi, aku deka minta ka kita baru baruh pegai opis kami.
“Aku deka mansik dulu atur nya lalu enti iya dikemendarka, bisi sukung enggau penyerta (ari kaban media) nadai kebuah iya enda digaga,” ku iya.
Iya madah munyi nya lebuh nimbal perambu deka numbuhka Platun Media kelebih agi di Sarawak baka ke kala dipadah sebedau tu.
Platun Media mungkur kaban media chelak enggau elektronik ari ejensi Perintah enggau Peribit ke nyadi sebagi agi ejensi nabur pemadah ke betul ngagai komuniti ba pengawa soldadu Malaysia.
Nimbal program ‘Hari Bersama Media Peringkat Satu Divisyen’ ke digaga begulai enggau media dua hari nya (belabuh ari 25 Januari), Zaki madah, iya betuju meri tanda terima kasih ngagai media di menua tu.
Kelimpah ari nya, iya madah, atur pengawa nya meri peneleba ngagai media ngasaika pengawa ke seruran digaga ulih sedadu Satu Divisyen.
“Ngarapka atur pengawa baka tu deka negutka agi kaul soldadu enggau media kelebih agi 1 Div,” ku iya.