KUCHING: Opis Menteri Dagang Dalam Menua, Koperasi enggau Pekara Bebeli Barang netapka rega maksimum nitihka pemadah rega ari pemun pansik rega di semua 32 pelilih mit menua tauka sitak mit di Sarawak belabuh ari bulan Januari 2014 ba pansik semua rega ke ditetapka ninting minggu.
Direktor Opis Pengawa Dagang Dalam Menua (PPDNKK) Stanley Tan madah, penetap rega nya mega bepun ari perati ejensi Perintah baka Opis Pengawa Betanam, Lembaga Pemasaran Pertanian Persekutuan (FAMA), Opis Jabatan Perkhidmatan Veterinar (JPV) enggau aum enggau pengeluar, pengimport, pemekal, sereta pemborong barang nya.
Rega maksimum mega ditetapka ba 13 bansa barang ke disekat di 32 pelilih mit Sarawak.
“Sida ke bedagang dipinta nyual barang enggau rega ke disekat nitihka rega maksimum ke ditetap ulih Perintah lalu mandangka rega ‘khas’ bechura kalas ba barang rega ke disekat, kena mida enggau barang bukai.
“Taja pia, sida ke bedagang diperansang nyual barang nya murah agi ari rega maksimum enti rega nya ke diambi sida iya murah agi,” ku Tan.
Iya madah baka nya lebuh dikerandau ba pengawa SKHMP beserimbai enggau hari besai Taun Baru China (TBC) di palan bebeli barang di pampang palan bebeli barang baru, Choice World, di Jalai Bayang Estate ditu, kemari.
Iya nambah, orang ke bedagang mega dilalau enti atur nya enda dititih, atur ke terit deka ninggang sida iya laban enda nitihka sekim tu.
Orang ke bedaja ke enda nitihka atur nya deka disaman nitihka Genteran Tusun Ukum, ‘Akta Kawalan Harga dan Antipencatutan 2011’ nyengkaum kena ‘penalti’ baruh penyalah nyual barang ke disekat rega lebih ari rega maksimum ke udah ditetapka, lalu tau kena ukum kot manggai RM100,000.00 tauka kena jil enda lebih ari tiga taun tauka kededua nya sekali tauka kompaun manggai RM50,000.
Lalu ba kompeni ke ngaga penyalah nya tau kena denda manggai RM500,000 tauka dikompaun manggai RM250,000 lalu seiku-seiku orang ke ngaga penyalah nya, ke enda mantaika rega barang bechura kalas ke rega barang ke disekat tau diukum kot maggai RM10,000 tauka dikompaun manggai RM5,000.
Lalu baka nya mega enggau kompeni, tau di denda manggai RM20,000 tauka dikompaun manggai RM10,000.
“Pegawai kami KPDNKK deka meresa semua palan ke selalu endur orang mayuh bebeli barang baka di pasar. Pengawa meresa tu deka digaga kami dalam pengawa nyaga penguna ari pengawa orang ke bedaja ngambi penguntung lebih maya hari besai.
“KPDNKK mega deka madah sereta ngaga publisiti belabuh ari diatu madahka rega maksimum ke udah ditetapka ngagai orang bedaja sereta mensia mayuh,” ku iya.
Iya madah sekim tu digaga ngambika penguna ulih meli barang ke berat ba sida iya maya hari besai enggau rega ke patut, lalu nyekat ari rega kelalu mar.
“Orang ke bedaja mesti nitihka atur tu dalam ngaga pengawa dagang sida iya sereta nemu tanggungpengawa lalu ngena hak sida iya. Sekim tu deka nyadi mujur enti semua ngembuan tanggungpengawa lalu bejalaika pengawa sida iya nithka atur,” ku iya.
Iya nambah, eti ditemu bisi orang bedaja enda nitihka atur sekim tu, pengguna tau madah ngagai opis menteri nengah emel [email protected]@kpdnkk.gov.my tauka betelefon ngagai opis PDNKK, Sarawak 082-466012 tauka anjung pesan jaku pandak (sms) ngagai 15888 lalu naip KPDNKK ADUAN <padahka pekara ke deka dikompelin> tauka ngagai opis PDNKK terus ke bisi di serata menua.
Sama bisi ngulu atur pengawa nya kemari, Sapit Direktor Opis Pengawa Dagang Dalam Menua, Koperasi, enggau Pekara Bebeli Barang (PDNKK), Mohd Nor Musa, enggau sekeda ari raban direktor palan bebeli barang nya, Datuk Safri Awang Zaidel enggau Datuk Amin Satem.