Kenegapka penyerakup enggau kaul ke manah ngambika enda tinggal pemansang ari bansa bukai ke udah mujur
MIRI: Gerempung Raban Bansa Kayan Sarawak (PKS) Pampang Bintulu ngembuan raban komiti ke baru pengudah aum besai ninting taun (AGM) pampang gerempung nya mujur diatur di Bintulu dikena nyiri tuai raban indu gerempung nya empai lama ke udah.
Presiden PKS, Dennis Ngau ke mega Kaban Kunsil Nengeri (ADUN) Telang Usan madah, beserimbai enggau aum nya, seiku indu orang dagang ke benama Lohong Tajang mujur dichirika nyadi chairperson gerempung nya lalu disempulangka Pengulu Awei ke dipilih nyadi Sapit Chairman sereta Avit Ngau dipaduka nyadi mandal Chairman.
Kelimpah ari nya, sekeda raban komiti bukai ke mujur dipilih iya nya nyengkaum Sekretari ke baru Stephen Augustine, Sapit Sekretari Julia Sitang sereta Tukang Wang Mathew Hawing.
Aum nya diatur kali ti ke-3 ungkup PKS Pampang Bintulu dikena milih raban komiti ke bejalaika pengawa dalam timpuh dua taun (2015-2017). Nitihka penerang, PKS udah ditumbuhka kenyau bulan Okt 2008 suba.
Dennis muji penyerakup raban bansa Kayan di Bintulu ke chukup ransing ngemujurka pejalai aum nya ari pun datai ke ujung aum nya.
Nambahka nya, iya ngelalau raban komiti baru ke udah dichiri mangku pengawa dalam gerempung nya ngambi bejalaika pengawa enggau naka pengeransing dikena ngemansangka pengidup raban bansa Kayan dalam mayuh bengkah sukut di nengeri tu kelebih agi di serata menua Bintulu.
Nangkanka nya, Dennis pechayaka mayuh raban nembiak baru kemaya hari tu ngembuan pengingin ati deka masuk gerempung tu, tang penanggul ke tampak dipeda iya nya sida ngasaika diri enda diterima.
“Nya alai, kemeranka pengeransing kita ngerapitka kaul enggau raban nembiak dikena narit runding sida ngambika tebuka ati masuk gerempung tu dikena ngenegapka penyerakup raban PKS,” ku iya.
Ku iya, raban nembiak baru enda patut ngembuan runding ke salah madahka sida enda sebaka penemu enggau raban ke lebih tuai ari sida. Lengkaka penemu nya lalu anang malu betanya minta penemu tauka sebarang jaku peransang ngambika ulih mujur sereta mansang nitihka singkang bansa bukai.
Kelimpah ari nya, Dennis mega madahka ari sukut penyampau, raban bansa Kayan dipeda agi mimit sereta nadai mayuh enti dibandingka enggau bansa bukai ke bisi di nengeri tu.
“Nya alai, kitai patut lebih ransing nirika penyerakup enggau kaul ke manah dalam bansa kitai ngambika ulih sama nyingkang mansang begulai enggau bansa bukai ke udah mujur,” ku iya nandu.
Beserimbai enggau aum nya, Dennis mega bisi mansutka jaku iya bekaul enggau sebengkah peminta ari Lohong ke minta PKS Pampang Bintulu diungkupka sebuah begunan dikena gerempung nya bejalaika pengawa. Dennis nimbal sereta minta gerempung nya nyendiaka sebuah keretas kereja ngambi muntang dikenataika ngagai perintah nengeri.
Naka ke diatu, PKS Pampang Bintulu ngembuan urung 200 iku raban ke masuk dalam gerempung nya. Berindik ari nya, Dennis ngelalau raban komiti gerempung nya lebih ransing bejalaika pengawa sereta naka ulih ngerapitka kaul enggau raban nembiak ngambika mujur narit lebih mayuh raban baru masuk gerempung nya. Dennis nagit urung 1,000 raban PKS masuk gerempung nya taun baru tu ila.
Beserimbai enggau aum nya, Dennis ngagihka geran bantu perintah ari baruh Projek Mit Pemansang Menua Pesisir (MRP) ke beungkus RM10,000 ngagai gerempung PKS Pampang Bintulu dikena sida bejalaika aktiviti sepanjai taun kelebih agi di serata menua Bintulu.