SIBU: Pusat Anglikan Sibu Jaya (SJEC) dipadu megai gelar champian Mangkuk Peliling Genap Taun Reverend Canon Jamal Senada udah ke mujur ngalahka tim Gerija Anglikan Saint John enggau gol 4-3, kena lemai hari Enam tu tadi.
Pekit nya diatur ba Stadium Tun Zaidi ti betuaika SJEC.
Dulu agi ari nya, Vicar Gerija Anglikan John Reverend Canon Jamal Senada ti mega Chairman Parocial Church Council (PCC) gerija nya bejadika pekit.
Perais disuaka ba Gereja Saint John di Jalai Tun Abang Haji Openg ditu.
Sama bela bisi datai meda pekit tu iya nya Sapit Chairman PCC Umpie Awi, Sekretari PCC Ujang Anyi, Chairman SJEC Basa Gali enggau chairman komiti pekit Rojest Petinggie.
Nitihka dipadah Rojest, pekit tu sebengkah ari program ninting taun kelimpah ngelai belabuh Karolling Krismas ke deka diatur gerija nya ujung bulan tu.
Tuju pekit diatur laban deka nempa kaul ti rat sereta ulah kerejasama bala raban pemegai pengarap Anglikan enggau raban gerija bukai ba sitak tu.
“Ngarapka udah tu ila pekit baka tu bela ulih diatur gerija Anglikan di Sarikei enggau Bintangor.
Kapten Gerija Anglikan Saint John Marcos Lasum enggau Kapten SJEC Rojest enggau bala raban bukai nerima perais ari Reverend Jamal.