Pengari ngatika diri tu sigi majak bejalaika tanggungjawab BN ngagai rayat di Engkilili
KUCHING: Kaban Kunsil Nengeri Engkilili Dr Johnical Rayong Ngipa madahka isu minta masuk Barisan Nasional (BN) ukai agi pun buah kenang laban diatu pan iya udah diberi tanggung pengawa ngari ke perintah nyadung projek mit menua pesisir (MRP) ngagai rayat ba sitak ke dipegai iya nya.Dr Rayong ke nyadi pengari rayat ngenati kediri udah bekau iya pansut ari nyadi kaban Parti Kebangsaan Sarawak (SNAP), madahka runding ke deka masuk BN ukai nyadika pun buah kenang ba iya, laban penemu nya datai ari rayat ti dipegai iya ba sitak Engkilili.
“Rayat ti mansutka penemu nya, lalu sida udah milih aku maya pengawa bepilih 2006, diatu sida deka aku masuk BN nyadi aku patut mega deka nitihka peminta sida,” ku iya.
Dr Rayong madahka diri diatu angkun amat ati laban udah diberi pengarap ngarika perintah BN nyadung projek mit menua pesisir (MRP) ngagai rayat ba sitak dipegai iya.
Nambahka nya Sapit Kepala Menteri Datuk Patinggi Tan Sri Alfred Jabu mega udah mansutka penemu ti madahka iya pengari ngatika diri ti mentas BN.
“Aku enda belalai.., aku enggau bala penyukung endang bisi ngenataika peminta deka masuk Parti Sa’ati Rayat Sarawak (SUPP),” ku iya.
Dr Rayong madahka tu bepun ari penemu rayat Engkilili enda ngemendarka sida iya diarika pengari ari luar agi udah tu ila bekau tiga penggal sebedau bepilih 2006 udah dipegai orang datai.
Ku iya, sida tu ti ngasaika diri semina deka dipegai orang asal lalu mantaika penemu mai iya masuk SUPP.
Ku iya, taja pan iya ngarika SNAP maya nya suba tang iya bulih sukung ti pemadu kering ari rayat ba sitak nya maya nya suba ketegal iya orang menua nya empu.
Dr Rayong mandingka jaku iya nya ngagai bekau ADUN sitak nya, Toh Heng San ke asal ari Kapit enggau Jonathan Krai Pilo ari Sri Aman ti dipadu nyadi chalun SUPP maya bepilih nya suba.
Nitihka ditemu, iya tu ari Skrang, ku Dr Rayong ti lalu madahka diri empu baru, endang orang asal ba sitak Engkilili.
Jonathan dipaduka nyadi chalun SUPP rambau bepilih 2006 ngelaban Dr Rayong tang alah lalu iya ke alah tu dipelabaka ketegal iya ukai orang asal menua nya empu .
“Bala rayat ditu sigi deka milih orang asal ditu empu, lalu sida udah madahka penemu diri nengah undi,” ku iya.
Dr Rayong mansutka penemu tu kena nimbal jaku Toh enggau Jonanthan ti madahka SUPP enggau BN enda nyilih penuduknya enggau parti komponen BN ti bukai tauka nerima pengari ngenatika diri masuk ngagai parti nya.
Toh enggau Jonanthan mega sama bela enda setuju enggau penemu ti baka nya laban ku seduai iya tau mai penyarut ngagai BN.
Berebak enggau tu tiga ari SUPP Pampang Engkili ti nyukung Rayong beretan enggau penemu diri ti minta pengari tu diterima masuk SUPP ngambika tau ngetan penduduk nya ba pengawa bepilih besai ti deka datai.
Sida tu iya nya Sapit Chermin Cr Sibat Krutap, Sekiteri Cr Nyambong Maweng enggau Penulung Sekiteri Cr Lai Chaw Soon.
Sida tiga tu ti sepenemu enggau pangan diri madahka Dr Rayong patut nyadi pengari BN-SUPP ba sitak nya rambau pengawa bepilih ti deka datai.
“Udah chukup peluang diberi ngagai orang luar. kami deka ke orang ari menua tu empu udah tu ila, iya nya Rayong ngarika BN,” pia ku Nyambong.
Ku iya, Rayong menang maya nya ukai ketegal rayat enda nyukung BN tang laban rayat enggai nyukung Jonanthan Krai ketegal iya ukai orang asal menua nya.