CYBERJAYA: Menteri Pemadah Komunikasi enggau Adat Asal, Datuk Seri Dr Rais Yatim madahka pengawa meri lisin ngagai tujuh bengkah stisin TV bebayar deka dipansik baru belabuh kemari lalu enti sema sida enda ngakun, lisin nya deka tarit pulai baru.
TERIMA KASIH: Rais Yatim (dua kanan) nyerahka lisin “Content Application Service Provider”, “Network Facility Service Provider’ enggau “Network Service Provider” ngagai Chermin ASTRO Datuk Badri Masri (tengah) di Cyberjaya, kemari. — Gambar Bernama
Pansik nya dipelaba tembu dalam timpuh dua bulan, ku iya madah ngagai bala pemberita maya pengawa nyerah lisin “content application service provider”, “network facility service provider” enggau “network service provider” ngagai stisin TV Astro ditu, kemari.
Nitihka Akta Komunikasi enggau Multimedia (AKM) 1988, ku iya, enti orang ke nerima lisin nya enda ngena iya ba sekian timpuh, penemu nya tau dipansik baru laban mayuh raban orang mega bisi ati ka minta lisin.
Orang ke megai lisin nya U Television Sdn Bhd, Asiaspace Digital Network Sdn Bhd, Pertubuhan Berita Nasional Malaysia, Fine TV Network Sdn Bhd, TM Net Sdn Bhd, MOL Media Sdn Bhd enggau De Multimedia Sdn Bhd.
Lebuh tanya ni maya lisin udah diberi ngagai tujuh bengkah kompeni nya, Rais madah: “Enda sebaka entara setaun ngagai tiga taun.”
Ba timpuh nya sebagi aja udah belabuh operasi, ku iya.
Lebuh nyaut siti tanya, Rais enggai nyebut nama kompeni ke enda aktif laban nya deka meri penemu ke enda berapa manah laban sida iya sigi bedau ngepunka operasi.
Ngambika adil ngagai semua orang banyak, orang badak, sida tu patut ngayanka prestasi. Enti enda, SKMM (Suruhanjaya Komunikasi Multimedia Malaysia) deka masuk champur lalu narit lisin sida. Nadai guna ga enti diberi lisin, sida ke ngempu nya enda ngena iya,” ku iya.
Lebuh ngenang pengawa nyerah lisin ngagai Astro kemari, Rais madah iya nyadi siti sejarah ba dunya tabur berita Astro, siti stisin ngayanka dunya luar, ulih dengkah baruh kemata AKM 1998.
Semua lisin nya di baruh karung migrasi Astro ari rejim Akta Penyiaran 1998 ke udah diketuka ngagai rejim AKM 1998.
Enggau pemansang nya, Rais ngarapka stisin TV bukai baka Media Prima enggau tujuh stisin TV bebayar patut ngasulka penyulut identiti diri empu enggau kreativiti ala Malaysia nengah tabur berita sida. — Bernama