Semua raban kunsil mesti nyikap diri enggau penemu ti chukup sereta bejalaika pengawa
SURAT PADU: Nansian (kiba) nyuaka surat padu nyadi Chermin MPP ngagai Lo (kanan)
KUCHING: Majlis Perbandaran Padawan (MPP) dipinta majak ngetanka pemanah atur pengawa ngambika tauk terus meri penguntung ngagai orang ti diau ba pelilih nengeri ti dipegai kunsil tu.Menteri Rampa Menua enggau Pengerai Mensia Mayuh, Dato Sri Wong Soon Koh madahka kena ngetanka pemanah atur tu dia semua kaban kunsil kandang nengeri tu enda tau enda nyikap diri enggau penemu ti chukup sereta angku bejalaika pengawa.
Ku iya, kunsil tu mega patut berunding enggau panjai enti nyema deka nukar adat tauka polisi kunsil tu kena tentuka ia endang mulaika penguntung ngagai mensia mayuh.
“Aku minta MPP ngetanka pemanah atur pengawa ti udah, lalu enti nyema kunsil tu nukar adat tauka polisi dia ia patut dikerundingka enggau panjai kena nentuka enda nguntin mensia mayuh.
“Enggau nya dia MPP enda tau enda ngembuan kaban kunsil tauka kaunselor ti bepenemu lalu angkun bejalaika tanggung pengawa sida,” ku iya.
Wong mansutka jaku tu ba pengarami ngangkat sumpah mangku pengawa Chermin MPP ba opis kunsil kandang nengeri tu kemari.
Leka jaku iya tu dibantaika Penulung Menteri Rampa Menua, Datuk Peter Nansian Ngusie.
Ba pengerami tu dia Lo Khere Chiang ,51, ngangkat sumpah nyadi Chermin MPP ti ke-17.
Iya ngisi penduduk nya ti ditinggalka puang udah bekau chermin ti dulu ari tu Tan Joo Phoi dipaduka nyadi Penulung Menteri ba Opis Kepala Menteri.
Lo belabuh mangku pengawa nya kena 21 Jun tu tadi sebedau ti ngangkat sumpah mangku pengawa nya kemari.
Bisi datai enggau ngulu pengerami tu iya nya Tan Joo Phoi, Sekitari Mendam Opis Menteri Rampa Menua enggau Pengerai Mensia Mayuh, Dr Penguang Manggil, Sapit Chermin MPP, Mohd Hashim Yap.
Wong ba jaku iya mega madahka diri ulih tepedaka penanggul ti deka ditapi kunsil tu ngena ngemansangka diri dudi ila.
Ku iya, taja pia iya pechaya sereta andal ati Kunsil tu ulih napi penanggul nya ngena peneleba 53 taun udah ditumbuhka.
Berebak enggau tu Lo lebuh ti bejaku ba pengerami tu mega madahka iya empu udah sedia napi penanggulnya.
Ku iya, iya tepedaka lima bengkah batang pekara ti tau nekul pemujur kunsil tu.
Kelimpah ari bungkur kandang menua ti chukup besai suntuk penatai pemisi mega tau muntanka progaram pemansang kunsil tu jemah ila, ku iya.