SARIKEI: Menua Sarikei ditu ke chukup tebilang enggau buah nanas tauka sekeda bansa kitai bisi ngumbai nya buah ‘brunei’, deka ngatur pengerami ke dikumbai sida Pesta Nanas.
Siti komiti pengatur pengerami tu ke bisi ditumbuhka lalu berengkah ngatur aum sida ti kedua, kemari udah merambu deka netap ke haribulan ngitu Pesta Nanas 2010 tu kena 4 ngagai 8 Ogos taun tu.
Aum komiti nya bisi diatur ba bilik alai baum Opis Residen Bagi Sarikei ke betuaika Residen Sarikei empu, Micheal Dawi. Penyampau bisi 40 raban komiti datai ngulu aum nya sereta ngajung ripot diri.
Ari aum nya, Micheal madahka sida deka berandau enggau silik senentang ripot pengatur pengawa ari tiap bengkah komiti mit ke udah ditumbuhka sida.
“Berindik ari aum ke udah diatur tu lalu mega gaya pengawa sereta pengerami ke deka dibantai ke ila, dia arap bendar ati pengerami Pesta Nanas ke serak tu ulih narit ati mayuh agi orang datai enggau ngulu pengerami,” ku iya bejaku ngagai Berita Iban ditu, udah tembu aum nya.
“Ari randau bala komiti enggau pengatur pengawa tu enggau Kaban Kunsil Nengeri Repok, ti mega Menteri Muda Industri Pemakai, Datuk David Teng Lung Chi, apin lama tu tadi, dia iya meri penemu diri, ngasuh bala kami merambu pengerami tu kena 4-8 Ogos 2010 tu.
“Lalu palan ke alai pengerami tu deka diatur ila iya nya Dewan Suarah Sarikei enggau endur pasar baru ditu iya nya ‘Central Market Sarikei’,” kata Micheal madahka baru.
Ari penerang iya mega, bala komiti iya udah ngatur mayuh bengkah main enggau pengawa ke disadang negerindu ke ati mensia mayuh sepemanjai pengerami tu ila.
“Nya alai aku ngari ke bala komiti minta sukung mensia mayuh ke diau ba sitak menua Sarikei tu ngambika meri kerejasama sereta sukung ke manah, kelimpah ari mantu kami ngambika pejalai program pengerami tu ila deka mujur.
“Mensia mayuh mega sigi dilalau datai magang lebuh maya pengerami tu ila,” ku iya meri jaku gerah.