KUCHING: Yayasan Sarawak nyediaka Biasiswa Bestari ngagai 15 iku nembiak ke nyulut dalam peresa Sijil Pelajaran Malaysia (SPM) enggau Sijil Tinggi Persekolahan Malaysia (STPM).
KENA NARIT ATI: Mensia mayuh rindu ke utai nyelaie maya makai malam tauka dini ari ulih datai ngagai In Auto Bistro ti berchurakka “Halfut Kereta” ba Felda Bukit Cherakah. — Gambar Bernama
Sapit Direkta Yayasan Sarawak Shuib Maknun madahka, biasiswa nya semina diberi ngagai 15 nembiak ke tulihka pemutus kira 10A+ dalam SPM sereta STPM.
“Nembiak ke pemadu nyulut dalam peresa, deka nampung pelajar sida ngagai Universiti Swinburne (Swinburne University of Technology) enggau Universiti Curtin (Curtin University of Technology) dalam mayuh bengkah kus.
“Kami seruran ngelalau sereta ngansak nembiak ngambika belajar bebendar sereta tulihka 10A+ lalu ulih nerima Biasiswa Bestari,” ku iya lebuhka bejaku bejadika Pameran Sains 2010 ba Sekula Kebangsaan Semenggok ditu kemari.
Kelimpah ari nya iya nangkan nembiak ngambika ngemeratka atur tauka ulah diri dalam pengidup ninting hari.
“Kemaya hari tu, kira 70 persin nembiak enda ngemeratka ulah diri lalu bekau ari nya nambahka pemayuh pengawa bala pengajar di sekula.
“Keterubah iya, nembiak enda tau enda bebasa ke apai indai laban enti nadai bebasa ke orang tuai, udah tentu mega nadai bisi basa ngagai pengajar,” ku iya.
Nambahka nya ku iya, bala pengajar di sekula kemaya hari enda tentu nyaga nembiak enggau manah lalu nya dipelabaka nyadi siti kebuah nyadi penanggul ulah ba sekula majak nyadi.
“Penanggul ulah endang siti penyakit ti balat bendar laban nyaga ulah diri endang tusah.
“Enti kitai enda nyaga ulah diri, kitai deka nesal sepemanjai pengidup laban ulah diri ti kurang deka ngasuh kitai ngereja pengawa ti enda patut laban enda berundingka pemanah tauka penyai,” ku iya.