Nyadika entara rayat enggau perintah meri projek pemansang
SRI AMAN: Raban Komiti Pemansang enggau Pengelikun Genturung Pendiau (JKKK) dipinta nyadi siti ejen ngatur pemansang sereta meri berita ngagai perintah senentang isu pengidup enggau penusah ti nuntung rayat ba genturung pendiau diri empu.
Kaban Kunsil Nengeri (ADUN) Lingga, Hajah Simoi Haji Peri madahka, sekeda raban JKKK disemaka nyadi siti jembatan ti nyambung rayat enggau perintah.
“Setiap JKKK patut mansutka penanggul rayat. Enti JKKK nadai meri kerejasama enggau perintah, perintah amat susah deka meri projek pemansang ngagai sitak menua kita,” ku iya bejaku.
Simoi nerang pekara nya lebuh ti bejaku bejadika ‘Program 1Malaysia Begulai enggau Ketuai’ sereta ‘Pengerami Gagahati Ngemaduka Nyadi Pengulu’, ianya Joseph anak Lichong nyadi Pengulu enggau Komiti Pemansang enggau Pengelikun Genturung Pendiau (JKKK) Rumah Robert anak Suyong, Kampung Nanga Peruan, Sri Aman ti diatur Opis Hal Ehwal Khas (JASA) Sarawak Bahagian Sri Aman ditu malam ensanus.
Simoi bejaku, ngenumbuhka JKKK nya siti chara kena ngayanka rayat ngambi ulih ngaga pengagaw kediri empu enggau jampat ngereja pengawa pemansang.
“Raban JKKK beguna bendar nyadi siti komiti bepun pengawa sereta ngatur pengawa perintah ti keterubah,” Simoi nerangka baru.
“Ari nya, beguna bendar ngagai stiap JKKK diberi latih sereta pengelandik dalam pengawa numbuh, ngatur sereta ngereja pengawa, ngurus sereta pemansang nyadi siti JKKK ti ngembuan juluk, gawa kediri empu sereta ngembuan hati semampai deka mansang.”
Bisi sama enggau ngulu pengerami nya, Pemesai Opis Bahagian Sri Aman/Betong, Whelthon Lumpoi, Sapit Chermin Parti Pesaka Bumiputera Bersatu (PBB) N.23 Lingga, Bakthiar Mathan, Pemanca Sii Toh Peng, Pengulu Abang Haji Mohd Salleh, Pengulu Haji Abdul Samad Haji Abdul Rahim, ketuai opis perintah, ketuai raban bansa sereta raban JKKK ke bukai.
Beserimbai enggau pengerami nya mega, Simoi bisi nyuaka surat mangku pengawa nyadi Ketuai bansa Melayu, bansa Iban, nyuaka duit pemeran hati nembiak sekula ti nyulut, meri duit bantu ngagai Indai Tunggal enggau nyuaka duit bantu ngagai raban orang timpang pendiau (OKU).