KUCHING: Projek SCORE ulih mai ubah ngagai pemayuh orang ke bekenaka perengka pengangkut bilun ba Mukah.
Menteri Pemansang Perengka enggau Penyambung, Dato Sri Michael Manyin Jawong madahka, pemayuh orang bekenaka bilun majak mayuh ba Mukah.
“Raban orang mayuh ke begunaka perengka pengangkut bilun ba Palan Padang Bilun Mukah iya nya manggai ngagai 88,547 iku.
Ari penyampau nya, penerebai bilun komersial manggai ngagai 6304 iku lalu penerebai bilun dalam menua tu iya nya 1,122 iku,” ku Manyin bejaku nyaut tanya ari Kaban Kunsil Nengeri (BN-Jemoreng) Abu Seman Jahwie bekaul enggau penyampau orang bekenaka perengka pengangkut bilun ba Mukah.
Maya pengawa Aum hari kedua renggat ke-16 Aum Kunsil Nengeri (DUN) kemari, Manyin mega madahka, raban MASwings udah mujur ngaga 20 kali penerebai bilun ari 21 kali ke dikemendarka Opis Pengangkut Menua Malaysia ba dalam masa seminggu iya nya Kuching-Mukah-Kuching.
“Raban MASWings udah merambu deka bekenaka bilun ATR72-500 ti ngembuan penyampau 68 iti penuduk nengah Kuching-Mukah-Kuching tang bedau ulih dipejalaika laban Padang Bilun Mukah enda chukup besai alai endur bilun nya sangkai,” ku Manyin bejaku baru.
Iya madahka, bilun ke besai mina ulih diguna ba Padang Bilun Mukah enti padang nya udah tembu ila.
“Bilun Boieng 747-800 deka dikena ba Mukah enti semak padang bilun baru tembu ke begunaka ungkus manggai ngagai RM600 juta,” ku Manyin.