Pengawa nyaga pengerai ukai dilempai ba opis ke bekuasa
BAKA TU MEH: Bayoi bejadika pengawa meresi kandang menua bebala mayuh, nyembur palan ti dipelabaka alai nyamuk betelu.
SERIAN: Rayat enda patut semina ngelempaika semua tanggung pengawa ngagai opis bekuasa (PBT) bekaul enggau pemereti genap iku kitai ke bela bisi ungkup diri nyaga pemeresi rampa menua.
Pia ku penemu Kaban Kunsil Nengeri (ADUN) Kedup Faderick Bayoi ti ngenang penyampau kes tabin denggi, chikungunya enggau Japanese Encephelitis (JE) ke majak nambah ngagai 100 persin di sitak mit Serian taun tu.
“Kitai semua nemu leka penyakit baka tabin denggi, chikungunya, JE deka majak berampit ari seiku ngagai seiku enti kitai enda chakah nagang sereta nyekat igi penyakit tu ari ngelekai.
“Kena nagang igi penyakit tu majak ngerampit, semua raban bansa patut bisi chara sereta beempu tanggung pengawa ngambika ulih ngemunaska igi penyakit tu lalu ukai semina ngelempai ngagai opis bekuasa aja,” ku iya.
Iya mansutka penemu nya lebuh bejaku bejadika Kimpin Pemeresi Bebala Mayuh ditu kemari.
Nitih ku Bayoi, taun tu bisi 146 kes tabin denggi enggau tujuh kes denggi bedarah diripotka nyadi enti dibandingka semina 60 kes aja taun siti nyin kemari.
Bayoi ke mega nyadi Walikota Opis Kunsil Pelilih Mit Samarahan ngelalau Opis Pengerai, Opis Kunsil Pelilih Mit Serian (MDS) enggau Opis Kereja Raya (JKR) ngambika mansik nama kebuah penyampau penyakit nya majak nambah.
“Aku ngarapka Opis Pengerai, MDS enggau JKR ulih mansik kebuah kes taun tu majak nambah enti dibandingka enggau taun siti nyin kemari.
“Engka bisi penanggul baka sistem parit ti patut dipantau kena nyeliahka ai ke betakat nyadika palan endur nyamuk betelu,” ku iya.
Iya mega ngelalau semua raban bansa di pelilih Serian ngambika ulih magi jam kena meresi kandang endur sida.
“Pemeresi amat beguna, laban enti kandang endur kitai kamah nyamuk deka betelu, nya alai kitai patut magi awak 10 minit sehari kena meresi endur kitai diau,” ku iya seraya ke madahka pemeresi tu meri pengerai.
Bisi datai ba pengawa nya kemari Sapit Residen Bahagian Samarahan John Awan enggau Sapit Chairman MDS Kaunselor Dr Simon Sinang Bada.