Saturday, May 25

Masterpiece merindang mensia mayuh ba KL malam 2 Februari

0

SIBU: Sekali agi raban artis tebilang Iban, Masterpiece deka datai merindang raban orang ke rinduka muzik ba Kaban Lama Pub & Karaoke (KL) ba No 4, Ringkat Baruh, Lurung Lanang 4 (sepiak hotel Kingwood), malam pagila (2 Feb).

BETEMU PAGILA: Masterpiece datai merindang ba KL malam pagila.

Lebuh dikerandau pengarang berita apin lama tu tadi, ketuai raban Masterpiece, Will, madah serak tu sida deka merindang bala ke datai nengah chara live band.

“Nya alai kitai ngarapka raban peminat enda ngira bansa, Iban tauka Cina anang muai awak tu betemu sereta beperindang enggau raban kami,” pia ku iya madah.

Will madah, pengawa tu mega diatur nyerumba pengerami Taun Baru Cina ti deka datai.

Bekenangka ‘show’ malam ke berengkah pukul 10 malam pagila, ku iya madah, baka ngelama tu raban sida deka merindang bala ke bisi datai enggau lagu tebilang baka ‘Sinu’, ‘Bulat Atiku’, ‘Misteri’ enggau mayuh agi.

“Ukai semina lagu ari kami aja, tang kami mega deka mai lagu ari artis tebilang ke bukai,”

pia ku iya seraya ke madah nengah awak tu iya meri ‘Selamat Taun Baru Cina’ ngagai semua peminat.

Nengah awak tu mega raban peminat dikemendar begambar begulai enggau raban Masterpiece.

Masterpiece ditumbuhka peranak chulin Sibu iya nya Kent (gitar/vokal kedua), Depha (vokal utama/keyboard), Will (gitar utama), Arold (drum) enggau Marcus (bass).

Ba Anugerah Muzik Dayak (DAMA) bulan November taun siti kemari, raban Masterpiece udah mai nama manah industri musik Sibu sepengudah mujur bulih lima iti gelar lalu nya meh pengemun pemujur sida majak

angkat ba industri musik Dayak ba menua tu.

Gelar ke diulih sida maya DAMA tu iya nya, Artis Baru Pemadu Nyulut (Iban), Muzik Video pemadu nyulut, Raban Pemadu Nyulut/Duo, Kulit Album Pemadu Nyulut (Iban) enggau ‘Album Of The Year’ (Iban).