BULIH PENELEBA NGAYANKA PENGELANDIK BA TV3: Diana (tiga kanan) sepengudah ngaga ‘show’ Malaysia Hari Ini (MHI) enggau TV3 taun 2010. Lalu sama bisi ba gambar Chairman DAMA ti mega ADUN Balai Ringin, Snowdan Lawan (tiga kiba), nyengkaum bala penyanyi bukai, Rickie Andrewson (kiba), Jerry Kamit (kanan) enggau Lydia Mike (dua kanan) ke sama bisi belagu ba program MHI.
KUCHING: Diana Nini, 29, seiku indu penakan Kayan-Kenyah, endang tampak berita ba industri muzik Dayak, berindik ari peransang sereta sukung diri sebilik enggau pangan ngujungka iya nyadi seiku penyanyi ari raban Orang Ulu ke mujur ba pengawa nya.
Nengah 4 iti album ke udah dikeluarka iya, ke digaga dalam lagu Iban, Kayan, Kenyah enggau Melayu, deka ditangkanka siti agi album (10 iti lagu) deka dikeluar tembu pengerami Gawai Dayak tu ila, ku Diana. Tebal ari lagu ke udah dikeluarka produser iya, ngena konsep pop rock, balada, jazz, etnik enggau ‘rock & roll’.
“Laban music Dayak diatu nyau majak maju, ‘genre’ lagu pan nitihka peneka raban nembiak taja pan bisi lagu ke agi ngena konsep joget tauka dangdut, tang enggi aku mayuh ‘genre’ moden,” ku pemesai pengatur pengawa ba Opis Residen Miri tu.
Diana ke suah menang ba pekit ‘Bintang Kecil’ renggat menua ngarika pelilih menua Limbang maya mit suba, madahka pengerindu iya ba music berengkah maya besekula suba, ke madahka diri besekula ba SMK Song, Kapit suba.
Diana ke mega kaban Gerempung Musik Dayak (DAMA), kala menang gelar ‘Anugerah Penyanyi Baru enggau Penyanyi Harapan’ DAMA 2008.
Ba pekit Anugerah Juara Rentak Ruai (AJARR) 2010 ti baru diatur bulan tu tadi, Diana enda masuk pekit nya laban nadai lagu baru.
“Maya nya aku bedau bisi lagu baru…Nyangka taun baru tu ila,” ku iya.
Taja pan besekula tinggi, ngembuan ‘Sarjana Muda Pengurusan Sumber Manusia’ ari Universiti Terbuka Malaysia (OUM), pengerindu iya ba muzik tetap bisi ba pengidup iya.
“Laban aku sama-sama deka terus nyukung industri muzik Dayak enggau bala penyanyi kitai Dayak bukai, pelaba aku, pejalai aku ba inustri muzik Dayak agi jauh,” ku iya.