BELI MEH: Pengeluar Album Selamat Hari Krismas Isa Lee. (Gambar mit) raban Hosanna ke nyadi artis ba album nya.
KUCHING: Network Twenty One ngeluarka album lagu Krismas dalam jaku Iban keterubah nengap konsep pop komersial enggau etnik nyerumba pengerami deka ngintu Hari Krismas 2011 tu.
Dibai raban Hosana, album Selamat Hari Krismas ngundan enam buah lagu Krismas ke chukup ngelantangka ati lalu tau ngerami raban ke megai pengarap Kristian ngintu Hari Krismas ungkup 2011 tu.
Album tu udah dikeluarka dua minggu ke udah ungkup orang ke rinduka lagu Krismas sereta kaban gerija serata Sarawak.
Pengeluar album Network Twenty One, Isa Lee madahka album tu siti ari projek raban bansa ke diungkupka ngagai kaban gerija sereta mensia mayuh.
“Album tu dikeluarka ba musin kitai deka ngintu pengerami Hari Krismas ngambika tau dikena beperindang sereta nyuaka bantu ngagai gerija.
“Tu meh chara dikena kitai nusui sereta bekunsika berita manah ba musin Krismas enggau pangan diri,”ku iya.
Hosana diarika tiga iku raban penanyi indu sereta seiku lelaki iya nya Aneth Alan (Aneth), Diana Anthony Blikau (Diana), Lezuizita Ripin (Leez) enggau Anthony.
Enam buah lagu ke bisi ba dalam album Selamat Hari Krismas iya nya – Kita ti Arap, Andal Dunya, Malam Kudus, Lebuh Orang Ngibun Domba, Dalam Nengeri Daud Keliaenggau Selamat Hari Krismas.
Sapa ke bisi ati deka meli CD album tu ke berega RM15 siti tau betanya ngagai Project Manager, Mervyn Tajem ba lumur 016 – 8781453 tauka Pengeluar Album Isa Lee ba lumur 013 – 8266081.
Ngarika Pengeluar Eksekutif Network Twenty One Tedewin Ngumbang, Isa Lee meri pengaga ati ngagai raban pengeluar program radio Cats Fm enggau Wai Fm ke udah bemainka lagu Krismas raban Hosana dalam timpuh seminggu ke udah.