MIRI: Sukung rayat ngagai parti penyakal ba pengawa bepilih besai (PRU) dipeda ulih muai sekeda hak sida nyengkaum bantu perintah.
Kaban Parlimen Sibuti Ahmad Lai Bujang madah, enti rayat andalka (nyukung) penyakal ba PRU nya udah diasaika sida deka napi pemedis bulih bantu.
“Penyakal nadai agih belanja ti tegap enti dibanding enggau perintah Barisan Nasional (BN), berindik enggau nya, sida enda ulih ngamatka semaya ngagai rayat,” ku iya lebuh dikerandau kemari.
Ambika chunto, ku iya, penyakal enda ulih ngagihka geran projek mit menua pesisir (MRP) ngagai gerempung tauka Komiti Pemansang enggau Pengelikun Genturung Pendiau (JKKK) dikena bejalaika aktiviti.
“Enti sebedau tu sida ulih bejalaika aktiviti nengah duit agih MRP, tang enti milih penyakal, hak nya nadai agi,” ku iya.
Tandu iya, gerempung tauka sarakup sebedau tu meras bejalaika pengawa tang enti sida milih chara nya (nyukung penyakal), pekara nya deka berubah tekala nya.
“Pekara tu deka ditapi rayat enti sida nyukung penyakal laban penyakal nadai ngembuan duit ti chukup meri MRP,” ku iya nambah.
Taja pan pia, ku Ahmad Lai, rayat ke dipegai penyakal enda diempaya baka nya aja, tang perintah BN semampai meri bantu ngagai sida.
“Ari sukut perambu pemansang perintah, BN enda ngelakka rayat ba baruh pegai perintah penyakal laban sida mega patut nerima pemansang,” ku iya.
Ambika chunto, pemansang infrasktruktur baka jalai alun, bekal ai beresi enggau kuasa karan endang diberi ngagai rayat taja pan enda sebaka penemu politik.
“Penyakal empu bisi nerima ubah pemansang ke diberi perintah BN lalu nya nunjukka BN ngemeranka pengelantang rayat,” ku iya.