LAWAS: Raban Iban ke enda bebala mayuh di Lawas udah ngayanka chunto ke manah dalam kaul enggau pemansang ba menua muak ke ujung Sarawak, indah sekeda ngembuan master degree.
Meri tabi ngagai sida, Datuk Amar Awang Tengah Ali Hasan madahka pengawa sida ke bekempit enggau raban bansa bukai ke mayuh agi tubuh lalu enda begilik sukung ngagai perintah BN ke udah ngasuh pekara tu nyadi nyata ba sida taja pan betubuh mimit ba pelilih tu .
“ Pemujur sida ba pekara ngemesaika rumah, singkang manah ba sentang pelajar nyengkaum bisi sekeda nya ngembuan diploma enggau master degree udah meri chunto ke manah amat taja pan bebala mimit “ ku iya bejaku ba pengerami Ngiling Bidai di Rumah Ajan ak Renang di Meragang kena malam Hari Minggu tu tadi.
Tengah madahka pemansang tu deka meri empas ke manah ngagai sida jemah, nambahka pemujur nya buah asil ulih ari perintah BN ke meri infrastruktur pelajar enggau awak bukai.
Iya ngansak sida semampai begempung seraya nentuka politik ke entap, madahka BN ngembuan rikud mela mensia mayuh enti dibanding enggau jaku puang ari penyakal ke semina deka ngerampas kuasa nengah gaya politik ke dibai sida kelebih agi ari Semananjung Malaysia.
Iya madahka Malaysia agi ulih ngetanka ekonomi taja pan di menua baka Amerika enggau Europe ekonomi enda menentu, tu setegal betuaika sereta bepeneleba ari perintah BN.
Berebak enggau nya, MP Lawas Datuk Henry Sum Agong mega kena puji laban ke puh bejalaika pengawa mela rayat ke semampai besemak enggau rayat.
“Aku enda kala begulai gawa enggau MP ke chukup rajin sereta sempil amat enggau rayat, enda ngira ari raban bansa sida,“ ku iya.
Enggau nya iya ngarapka Henry enggau bakih ari Limbang, Hasbi Habibolah menang baru nengah gempung BN betuaika Najib ba pengawa bepilih besai ngambika agenda pemansang enda putus.
Ba sentang pemansang ekonomi di Lawas, ladang sawit enggau kilang udah mujur muka mata peranak menua ditu ngemansangka tanah sida nengah betanam ke diri empu.
Semina bisi tiga buah rumah panjai di pelilih tu, iya nya Rumah Ajan Ak Renang di Meragang, enggau dua buah da agi di Lumut enggau Siang Siang di pelilih ke alai raban bansa bukai ke mayuh agi tubuh baka Lun Bawang, Melayu enggau China .
Tengah madahka mayuh agi pekara agi dipeguna, nyengkaum ungkup raban bansa Iban alai iya udah minta ari Menteri Pemansang Menua Pesisir enggau Kandang Menua meri pemerat ba ungkup pan dikena ngintu rumah panjai.
Bela bisi datai ba pengerami nya Henry Sum, ADUN Dr Abdul Rahman Ismail (Bukit Kota), Paulu Palu Gumbang (Batu Danau), D.O. Lawas Mohd Supaih Hamdan, tuai-tuai raban bansa enggau temuai ari Sabah, Brunei enggau Limbang.