SARIKEI: Kaban Kunsil Nengeri (ADUN) Meluan Wong Judat madah pemutus iya ningkil kediri ari Parti Progresif Demokratik Sarawak (SPDP) lalu minta masuk nyadi kaban Parti Pekereja Sarawak (SWP) mengkang enda berubah.
“Aku udah ngaga pemutus ti engkeman sebedau nganjung surat ngagai Opis SPDP kena 7 Ogos tu tadi lalu ba hari ke sama mega aku nganjung surat peminta masuk nyadi kaban SWP. Aku enda begilik penemu enggau pemutus nya,” ku iya.
Pekara nya mandangka iya sigi mutus ati ningkil kediri ari SPDP lalu masuk SWP, ku iya lebuh dipinta nimbal komen Presiden SPDP Tan Sri William Mawan ba lambar mua suratkabar The Borneo Post enggau lambar 11 Utusan Borneo Berita Iban kemari.
Ba penerang nya Mawan madah Wong ngembuan awak ngaga pemutus enda nyadi ningkil kediri ari SPDP selagi Kunsil Besai (MT) parti bedau ngaga pemutus ba aum MT nya dalam kandang dua minggu ti deka datai.
“Chara teknikal, peminta Wong ningkil kediri ari parti nadai penanggul selagi Kunsil Besai bedau ngaga pemutus nerima tauka enda peminta iya nya,” ku Mawan.
Enggau kebuah bukai Mawan nyemetak madah enti sema Wong jadi ningkil kediri iya enda ulih masuk sebarang parti gempung BN jemah ila. Enggau jaku pandak, iya deka nyadi seiku ari kaban penyakal. Iya semina ulih diterima baru masuk nyadi kaban BN enti semua parti gempung BN nerima iya tang ba SPDP sigi enda nerima laban iya udah ngaga pemutus dulu ke baka nya.
Pemutus iya ningkil kediri ari SPDP lalu masuk nyadi kaban SWP bedau dikerandau sereta nadai sebarang pemutus ari MT, Wong ngasaika nya atur ke endang bisi ba parti nagang iya ari neruska juluk ati iya.
“Diatu, aku ngasai kediri nyadi kaban SWP. Aku udah begulai enggau tuai SWP, ngenatai kediri ba pengerami ke diatur SWP lalu udah megai menira SWP ba mua mensia mayuh,” ku Wong.
Kena ngamatka jaku enggau pengawa iya, Wong lebuh dikerandau pemberita ba hotel madah iya nyadi pengulu ngagai seraban 60 iku Tuai Rumah (TR) ari sitak Meluan enggau Pakan nemuai ngagai Presiden SWP Larry Sng di Kuching.
“Kami deka nemuai ngagai Kuching betemu enggau Presiden SWP. Tu ke dua kali TR dibai aku betemu enggau Presiden SWP. Penemuai keterubah suba, aku mai 20 iku TR lalu pengawa tu deka majak diatur sebedau pengawa bepilih besai (PRU) ke-13 nyadi,” ku iya.
Wong madah kebuah iya nganjung surat ningkil kediri ari SPDP laban deka ngelaban penyandang Kaban Parlimen Julau ke lalu nyadi Sapit Menteri Pemadah, Penyambung enggau Main Asal Datuk Joseph Salang Gandum ari Parti Rayat Sarawak (PRS) ba PRU13 tu ila.