MILIH CHALUN KE PATUT: Maya ngundi milih komiti sereta raban ke mangku pengawa ba PBTMS ungkup taun 2012-2015.
KUCHING: Spencer Birai dipadu baru megai pengawa nyadi Yang Dipertua (YDP) Gerempung Ex-Soldadu Malaysia Sarawak (PBTMS) ke taun 2012-2015 enggau penuduk bukai dipegai komiti ke baru dipilih nengah Aum Besai Wakil ari PBTMS 2012 ti ke-55 kemari.
Spencer ke betangkup enggau Jossem ak Daweg (32 undi) enggau Abg Mohd Yassin Datuk Zainuddin (50), menang teulihka 95 undi ngalahka Jossem enggau Abg Mohd Yassin.
Kerusi Sapit YDP nadai nerima sebarang tanggi lalu agi mengkang dipegai Nalang ak Selingau ari Sri Aman.
Kerusi Mandal YDP milih dua iku ari enam iku ke nyadi chalun, iya nya Abg Mos Abg Tunggal ari Nangka enggau Luang ak Baring ari Kanowit.
Penuduk Chairman Tetap PBTMS bisi dua iku chalun, iya nya Tiles ak Bansi ari Batu Kawa enggau Ali Baginda Subir Khan ari Bintulu, lalu penuduk nya di menang Tiles ak Bansi ke nerima 139 undi dibanding enggau 38 undi.
Kelimpah ari nya, Sapit Chairman Tetap dipegai ulih Tuah Mohd Nor enggau Penyading Penemu gerempung nya ke agi ngetanka penuduk iya, Mejer Peter Runin (B).
Lima belas ari 29 iku komiti bukai ari gerempung tu milih Mej Hj Amir Abdullah Hasaan (B), Kapt Mohd Handeri Hashim (B), Sampurai ak Tungau, Jack Baie ak Saing, Kapt Meran ak Ubong (B), Lunyat@Dreman ak Nyareng, Ajun ak Lasu, Chasing Kasan ak Tunching, Edmund ak Senos, Sandoi ak Jangga, Roland Demong ak Radin, Sahari Gani, Ibrahim Taha, Jimbau ak Galau enggau Tr Baja ak Rawing.
PBTMS bisi urung 16,000 iku kaban di serata menua tu lalu bisi Indu Opis ke bepalan semenanjung.
NGEMERATKA TANGGUNGPENGAWA: YDP PBTMS, pemesai enggau komiti iya belabuh baum udah pengudah pengawa bepilih PBTMS.