KUCHING: Gerempung Kayu Tropika Antarabansa (ITTO) aruh ngedutka kaul enggau kerejasama ari semua piak ngambika ulih bejalaika pengawa ngetanka kampung tropika.
Kepala Menteri Pehin Sri Abdul Taib Mahmud bejaku kemari (ensana), seraya raban ke numbuhka ITTO, Malaysia tegap enggau tuju ITTO dalam langkar pengawa Sempekat Kayu Tropika Antarabansa (ITTA).
“Aku arap mayuh agi menua bukai masuk nyadi kaban ITTO. Kitai begunaka mayuh agi kaling kunsi ngambika ulih bekerejasama,” ku iya dalam teks jaku ke dibacha Menteri Pengeraja Asal enggau Rampa Menua Kedua Datuk Amar Awang Tengah Ali Hasan.
Iya bejaku munyi nya dalam bejadika Sesi Majlis Perkayuan Tropika Antarabangsa Ke-48 di Yokohama Jepun.
Taib nambah, Sarawak ngurangka pengawa betebangka kayu ninting taun dikena ngetanka penyampau kayu ke dikeluarka ari ladang kampung asal.
“Kami ngemansangka sistem nyidi chara serap lalu bekunda ngerembaika kandang endur ke dijaga ngambika tau ngintu biodiversiti,” ku iya.