PENYULUT: Ainul Amin (kanan) nerima perais ba gelar pemadu nyulut dalam pelajar ari Entri seraya dikemataka (ari kiba) Fauzi, TK.Dollah Piee enggau Penghulu Ayub Hassan.
MARUDI: Seraban 72 iku nembiak ke beumur entara 13 nyentuk ke 17 taun ari empat buah sekula Primari enggau dua buah sekula Sekondari baka SMK Telang Usan, SMK Marudi, SK.Good Shepherd enggau SK Datu Sharif Hamid udah masuk ba program 3R iya nya program Remaja Raikan Ramadhan ke diatur ba Surau At-Taqwa, Genturung Pendiau Narum, Marudi.
Program nya diatur Raban Indu PBB Ranting Kampung Narum beserimbai enggau pengerami Nuzul Al-Quaran.
Program 3R nya ngemeratka ajar ba jalai pengarap ke dikenataika Dr. Amin Wahid ari HIKMAH Miri.
Program 3R nya udah dipenyadika Menteri Muda Perengkaguna Mensia (Penyambung Ai) ke mega Menteri Muda Betanam Betupi, Datuk Sylvester Entri Muran ke meransang bala nembiak ngenyemakka diri enggau Allah seraya ngemeratka disiplin enti deka mujur ba pelajar, ku iya.
Entri ke mega ADUN Marudi madah, ukai mudah enti deka mujur ba pelajar enti nadai penyakah belajar.
Beserimbai enggau pengerami nya, Datuk Sylvester Entri mega nyuaka pemeri mata duit ngagai semilan buah masjid di Marudi, ngambika bisi dikena sida ngatur pengerami maya Hari Raya tu ila.
Berebak enggau nya mega bisi disuaka gelar nembiak ke nyulut ti diberi ngagai Ainul Amin ari SMK Telang Usan.
Sama bisi ngulu program nya, Pengulu Ayub Hassan, Ketuai Genturung Pendiau Izahar Taha, Ketuai Genturung Pendiau Dollah Piee enggau Ketuai Genturung Pendiau Fauzi Hussein.