SIBU: Sapit Kepala Menteri Datuk Patinggi Tan Sri Alfred Jabu Numpang madah, bansa Iban di serata menua Sarawak enda tau enda berakup ba pengawa nyungkak tikas pengidup raban bansa, ngambi pulaika pemanah ngagai semua.
Sepemanjai tiga hari Simposium Gaya Pengidup enggau Adat Iban nya, bisi 24 iti resolusi udah diperunding serta ditusun sereta dianjung ngagai perintah menua ngambi dikemendarka.
“Nya mandangka kitai berakup sereta sepenemu berandau sereta ngiga chara mutarka penanggul ke ngenusahka pengidup kitai ngelama tu.
“Nengah resolusi nya, pekara nya deka diserenih lalu ditusun nyadi siti aja sereta deka dianjung ngagai perintah menua ngambi dikemendarka.
Iya bejaku munyi nya ba atur pengawa nutup Simposium Adat Iban 2013 ba sebengkah hotel ditu malam kemari.
Sama bisi ngulu simposim nya, bini Jabu Dato Sri Empiang Jabu, Chairman Komiti Simposium Gaya Pengidup enggau Adat Iban 2013 Tan Sri Celestine Ujang Jilan enggau sapit iya, Datuk Gramong Juna ke mega Menteri Muda Dagang Temuai Enggau Pemansang Tanah sereta Sekretari Simposium Gaya Pengidup enggau Adat Iban 2013 Tan Sri Datuk Amar Leonard Linggi Tun Jugah.
Enda tinggal mega Menteri Pemansang Rama Tan Sri William Mawan Ikom,Sapit Menteri Pemansang Menua Pesisir Enggau Pelilih Menua, Datuk Alexander Nanta Linggi, Menteri Muda Perengkaguna Mayuh (Kuasa karan Engagu Penyambung) Datuk Dr Stephen Rundi Utom, Menteri Muda Betanam Betupi (Gerempung Peladang) Datuk Sylvester Entri Muran, Menteri Muda Pemansang Menua Pesisir Enggau Pengawa Berumah Datuk Francis Harden Hollis, Chairman Tenaga Nasional Berhad (TNB) Tan Sri Leo Moggie, Chairman Majlis Adat Istiadat Sarawak Datu Nellie Tanggai enggau sekeda bala Kaban Parlimen sereta Kaban Kunsil Nengeri ke bukai.
Bisi 470 iku orang ke enggau ba Simposium nya ari serata menua tu ngulu seminar ke diatur ngelama tiga hari ke bepalan ba Sibu sekali tu.
Jabu ke mega Menteri Betanam Betupi Moden ke mega Menteri Pemansang Menua Pesisir, besemaya nengah bantu sekeda menteri kabinet ke bukai nentuka semua resolusi nya dikemendarka perintah menua ila.
“Aku arapka semua langgur penemu ke diulih kitai nengah resolusi maya Simposium tu diterima perintah menua laban kitai ngembuan resolusi ke manah amat laban ngelanggur resolusi nya bepelasarka undang-undang sereta nguntungka semua bansa Iban di menua tu,” pia ku Kaban Kunsil Nengeri (ADUN) Layar nya.
Ku iya, Simposium ke baka tu patut ditampung nembiak rebak baru dudi ila ngambi pulaika pemanah ngagai bansa Iban.
Jabu mega muji Yayasan Tun Jugah ke udah ngatur Simposium begempung enggau gerempung Iban/Dayak ke bukai, nyengkaum ijinsi perintah sereta udah bebendar mantaika mayuh bengkah pekara ngambika ulih mantu nyungkak tikas pengidup bansa Iban.
“Ketegal deka ngeninggika bansa Dayak di menua tu, Yayasan Kebudayaan Dayak udah setuju melanja pengawa ngeluarka dictionary Iban-Inggeris, Bidayuh-Inggeris enggau Orang Ulu-Inggeris.
“Tu sebengkah agi ari pemujur dikena kitai ngeninggika bansa ungkup nembiak rebak baru, ngambika sida ulih nampung pengawa tu belama jemah ila,” ku iya.