KUCHING: Raban Nembiak Parti Pesaka Bumiputera (PBB) deka chakah ngemeratka pekara ekonomi, pelajar, politik enggau pemansang infrastruktur kelebih agi ti bekaul enggau peranak menua pesisir nengeri tu.
Ketuai Raban Nembiak PBB, Datuk Fadillah Yusuf madah, raban nembiak parti nya deka chakah enggau mekuh ngemerat sereta ngemansangka semua pekara nya.
Bekaul enggau ekonomi, Nembiak PBB deka naka ulih bejalaika tanggungpengawa ngerembaika semua sukung tauka bantu ti disediaka perintah ngagai orang dagang Bumiputera, kelimpah ngiga jalai dikena narit mayuh agi orang dagang (Bumiputera), ku iya.
“Raban Nembiak PBB deka chakah muka peluang ti engkeman tauka mayuh agi ngagai orang dagang kelebih agi orang dagang di menua pesisir, laban menua pesisir senentang penyambung infrastruktur enggau perengkaguna bukai (bedau sampal bisi) patut dikemanahka agi.
“Sukung iya nya bekaul enggau belanja ti disediaka perintah dikena mantu orang dagang Bumiputera, nyendiaka latih enggau perengkaguna ti ulih ngemuntangka pengawa dagang sekalika lisin tauka peremit enggau ke bukai
“Semua pekara ti dipejuraika nya endang dikeandal sereta dikearapka ulih dibai raban pemesai Nembiak (PBB) ngagai renggat pemadu tinggi parti lalu dikenataika ngagai perintah,” ku iya.
Fadillah ti mega Kaban Parlimen Petra Jaya mansutka pekara nya dalam aum pengarang berita pengudah nyimpul jurai Aum Besai Ke-13 Raban Nembiak enggau Orang Indu PBB ti diatur ba BCCK ditu, kemari.
Bejaku baru, bekaul pekara pelajar ku iya, raban Nembiak deka mekuh ngemanahka servis iya nya perengka ngajar pengajar dikemanah, ngemayuhka pengajar peranak menua tu ngajar di nengeri tu kelimpah ari ngemanahka infrastruktur sekula, elekterik, bekal ai enggau ke bukai.
“Pengajar ti dianjung ngajar ngagai sekula patut bisi asas dalam subjek teras ti diajar sida.
“Ambika banding, pengajar ke dianjung ngajar ngagai sekula iya nya pengajar Bahasa Melayu tang diasuh ngajar Bahasa Inggeris, lalu tu engka sebengkah kebuah ari takah pelajar di mengeri enggau menua pesisir majak besai,” ku iya seraya madahka raban Nembiak parti beratka pekara nya ngambika takah pelajar entara menua pesisir enggau mengeri ulih dirapitka.
Nambahka nya dalam pekara politik ku Fadillah Raban Nembiak PBB deka neruska program ti engkeman baka Amarda Pemuda, program Kerjaya enggau mayuh ke bukai.
“Nengah program Kerjaya kami deka dibai ngagai menua pesisir ngambika peranak menua pesisir teulihka penerang ti betul enggau pemadu baru awakka sida ulih besemekih dalam pemansang menua,” ku Fadillah.
Bekaul enggau pemansang infrastruktur, dikearapka penyambung broadband enggau internet ulih dikemanahka agi ngagai menua pesisir kelebih agi ngagai sekula menua pesisir ngambika pengawa ngajar enggau belajar nadai penanggul, ku iya.
Kelimpah ari nya,bisi dipejuraika Raban Nembiak PBB minta jalai Pan Borneo digaga enggau naka pengelengkas sereta jalai ke jai enda tau enda dikemanahka ngambika ulih ngurang enggau nyeliahka penanggul bebadi ba jalai alun.
Ku Fadillah ti nyadi Menteri Kerja Raya, ba renggat perintah besai pengawa ngemansangka Pan Borneo sebengkah manifesto ti diberi ba renggat Barisan Nasional.
“Ba renggat opis menteri perambu kami, jalai Pan Borneo iya nya ari Sematan, Sarawak nyentuk ngagai ujung menua Sabah deka berengkah dikemanahka bererenggat ari diatu ngagai taun 2025, ti begunaka ungkus belanja urung RM22 billiun.
“Dikerandau renggat nengeri Sarawak, pengawa ngemansangka jalai Pan Borneo bepelasarka ni ke patut dikemeratka dulu,” ku iya seraya madahka Raban Nembiak PBB bebendar nyikap diri napi pengawa bepilih ti deka datai.