KUCHING: Tiga ratus semilan belas bengkah pinta nyereta ‘Skim Pembiayaan Mikro’ nadai bungai udah dikemendar perintah besai nyentukka bulan November 2013 lalu nya mungkur 95 peresin ari semua 337 bengkah pinta di nengeri tu.
Menteri Dagang Dalam Menua, Koperasi enggau Pekara Bebeli Barang Dato Malek Hassan madah nengah sekim nya, sepenyampau RM2.3 juta udah diagihka perintah ngagai orang dagang mit Sarawak (319) dikena ngepun tauka ngerembaika dagang.
“Dalam atur ngubah pengawa dagang ari iya ke mit ngagai ke besai, perintah meretika guna nyendiakka puku ngagai orang dagang mit.
“Nengah ‘Skim Pembiayaan Mikro’ nadai bungai, orang dagang mit disedia enggau puku dikena meli perengka dagang sereta nambah modal musinka dagang sida,”ku iya.
Iya mansutka jaku tu ba Pengerami Ngintu Hari Pendaja enggau Orang Dagang Mit 2013 renggat Nengeri Sarawak ke diatur di Medan Niaga Satok ditu, kemari.
Statistik mandang, naka 7 November 2013, opis menteri ke bekaul udah nerima 21,432 pinta ba serata menua ke alai perintah udah ngagihka RM100 juta dalam taun 2013 sereta tambah RM50 juta ba taun 2014 dikena ngemujur sekim nya.
Iya mega madah perintah bisi ngagihka wang turu penyampau RM68, 760 ngagai 2 Gerempung Pedaja enggau Orang Dagang Mit di Sarawak ngambika tau dikena bejalaika program pemansang modal mensia kelebih agi ba atur dagang.
Ku iya, raban pendaja enggau orang dagang mit patuit disikap enggau penau sereta pengelandik ti diguna ba pekara dagang lalu perintah andal nyendiaka puku dikena ngemujur juluk nya.
Perintah udah nyendiakka wang turu RM4 juta dikena bejalaika program pemansang modal mensia di serata menua ke alai naka ke 11 November taun tu 30 buah gerempung (NGO) ke nyengkaum gerempung pendaja nerima agih sepenyampau RM1,089,565.
Ba kaul ke sama, Menteri Muda ba Opis Kepala Menteri (Pemansang Orang Dagang) Datuk Mohd Naroden Majais ngansak 140 000 iku orang dagang mit di Sarawak ngerijister dagang sida di Opis Kunsil Kandang Menua (PBT) tauka ba Opis Chukai ngambika tau diserangkum enggau sekim insuran ke disedia.
Iya madah, naka ke 11 November 2013 sepenyampau 15,306 pedaja enggau raban orang dagang mit nengeri tu diintu negah sekim nya.
“Aku ngansak raban orang dagang ke bedau ngerejister dagang datai ngagai opis ke bekaul lalu ngerejister dagang sida ngambika bela ngasai pemanah sekim insuran.
“Perintah mega nyendiakka ‘Skim Pembiayaan Mikro’ nadai bungai ngagai semua pedaja enggau orang dagang mit di serata menua lalu awak ke bansa tu patut diperebut,’ku iya.
Pengerami Ngintu Hari Pedaja enggau Orang Dagang Mit 2013 renggat Nengeri Sarawak kemari dipenyadi Kepala Menteri Pehin Sri Abdul Taib Mahmud lalu bela digulu bini iya, Pn Sri Ragad Kurdi Taib.