ROBAN: Bedau lama tu tadi,kitai dikenyitka enggau berita baya ngeluwakka kerat mensia nadai pala, lengan enggau kaki, sekali agi peranak ditu dituntung penusah tetemuka bangkai seiku nembiak indu beumur 12 taun ba tisi jalai ditu, kemari.
Mansa dikelala enggau nama Rinnie Tiew anak Tiew Kutey ,12, berasal ari Rumah Nunung, Menggeris, udah ditemu peranak genturung pendiau dia ke benung mansa nurun ke umai enda jauh ari palan penyadi, urung pukul 6.30 pagi.
Mansa udah ditemu gegaring ba tisi Jalai Roban-Kabong iya nya enda jauh ari rumah panjai Rumah Robert, Sungai Pasir, Roban.
Apai mansa, Tiew Kutey, 47, madah, kena lemai ensana (Hari Lima) sebedau penyadi nya, mansa begulai enggau iya sereta seiku da agi aka iya ngelawa pengerami nikah seiku kaban belayan sida ke diatur ba Rumah Robert, Sungai Pasir, Roban.
“Iya (mansa) adi pengkuan ari 6 diri menyadi lalu baru udah tembu sekula ba sekula primari ba Sekolah Kebangsaan (SK) Engkabang, sereta deka nampung pelajar ngagai sekula sekondari ba taun ti deka datai tu.
“Aku tekenyit bendar lebuh ninga utai ke nuntung anak aku, kelebih agi, maya aku digerak dani kemari lalu ninga berita enda manah bekaul enggau pekara nya.
“Aku enda ulih ngetatka penyinu ati diri sepengudah ninga berita ti nuntung anak aku, kelebih agi lebuh meda iya udah tengkering kangkang lalu nadai enseput agi,” ku iya maya dikerandau pemberita ba Rumah Mayat Sepital Saratok, kemari.
Indai mansa, Seloma Jenin, 50, ke mega bisi dikerandau maya nya enda ngadang penyadi nya nuntung anak iya.
“Aku baka ke enda pechaya lebuh ninga berita ti nuntung anak aku. Tu laban maya iya nurun begulai enggau aka enggau apai iya lemai kemari (ensana) maya ngulu pengerami nikah nya, iya baka ke nadai nenama.
“Iya (Rinnie) maya ngulu pengerami nikah nya nepan mutosikal begulai enggau aka iya, lalu apai iya nepan mutosikal enggau orang bukai.
“Nya meh kepenudi aku meda anak aku nya,” ku iya enggau sesabak lebuh dikerandau pemberita.
Nyerumba enggau nya mega, Kepala Polis Pelilih Saratok (KPD), DSP Lee Thai Lein lebuh ditelefon ngesahka bisi nerima riput bekaul enggau penusah nya, lalu begeguai ngelawa palan penyadi.
Kes benung ditasat piak polis.