MARUDI: Seiku nembiak sekula primari tiga di SK.Lubok Nibong lemas lebuh seduai meapai nani pukat ba parit besai ke alai apai iya nya pengereja pengawa ba Ladang sawit Tembarap 1 di Bakong.
Nembiak lelaki nya, Stanly Umpoh ngaling apai iya maya penusah nya nyadi ke alai apai iya Umpoh Raman gawa nyadi deriba luri ba ladang dia.
Ku seiku kaban sida ke madah kemari urung pukul 4.30 lemai, iya enggau apai iya nani pukat ba parit besai penalam 10 kaki nya.
Udah nemu apak ke manah alai ngetan pukat, dia apai iya madah ngagai anak iya enda ngasuh mindah tang nganti, enda datai lima minit lebuh apai iya nyengau ngagai alai iya ke bediri meda anak iya nadai peda agi ba tebing parit.
Bisi pengirau, dia iya mai bala bakih sepengawa begigaka anak iya tang nadai temu.
Meda baka nya, iya lalu bepadah ngagai polis enggau bomba.
Ku Kepala Bomba Marudi, Nicholas Belulin, iya bisi nerima kangau ari apai nembiak nya urung 9.29 malam tang laban hari nyau laun dia sida ngelanjarka pengawa begiga ngagai pagi siti.
Nicholas Belulin enggau lima iku pemesai bomba ke bukai datai kia ngagai palan alai penusah tang nembiak nya udah temu apai iya enda jauh ari tempat alai iya ngasuh anak iya nganti urung pukul 6.15 pagi.
Bangkai iya lalu dibai ngagai Sepital Marudi pagi kemari ke alai rumah mayat penuh endur kaban belayan ke ngesah pemati.
Apai iya, Umpoh Raman bansa Iban Rumah Merikan, Lubang Kompeni, Lubok Nibong seraya indai iya bansa Berawan ari Rumah John Mato, Long Tuyot, Tinjar.