UNGKUP NUAN: Sulok (dua kanan) enggau chairperson pengatur pengerami Jacqueline R David (kanan) ngarika KDJA nyuaka potret ngagai Datuk Rohani (tiga kiba).
UNGKUP KITA: Rohani (dua kiba) nyuaka ‘mock cheque’ ngagai Sulok (dua kanan) ngambika bisi dikena KDJA ngatur pengawa serakup nya.
PENGELALU: Ketuai pemberita The Borneo Post, Churchill Edward ngelaluka penatai Rohani ba atur pengawa nya.
KUCHING: Serakup Pemberita Pelilih Kuching (KDJA) udah mujur ngatur malam Ngenang Budi Media Besuluka Budaya Antarabansa ba Hotel Hilton ditu malam Hari Lima tu tadi.
Diatur begulai enggau Opis Menteri Pekara Indu ,Ruang Bilik enggau Pemansang Komuniti, pengamal media dilalau presiden KDJA Sulok Tawie ba sentang tanggungpengawa sida nyadika seruan ba pekara pemadah.
“Kitai diberi tanggungpengawa nyadung berita ngagai mensia mayuh lalu nagang ngemansutka isu ke enda ngelantang ati tauka ngeruga kaul bansa seraya seruran ingatka nengeri Sarawak udah lama ngasaika pemaik betetaun ke udah ,” ku iya .
Seraya nya Menteri Opis Menteri Pekara Indu , Ruang Bilik enggau Pemansang Komuniti Datuk Rohani Abdul Karim ke mega bisi datai ba pengerami nya ngarapka kaul ke rapit entara media enggau perintah deka semampai ditanggam.
“Kaul entara media enggau perintah tau disemaka baka buluh aur enggau tebing, iya nya chara bekunsi dikena nyadung berita ngagai mensia mayuh di menua tu .
“Aku arapka kaul tu enda putus dalam meri penerang ke nyemetak sereta baru,” ku iya .
Kaban KDJA mega beperindang engau kaban diri nengah chabut tikit benasit enggau pekit karaoke.
Bisi datai mega ADUN Balai Ringin Snowdan Lawan, ketuai sekretari Opis Menteri Pekara Indu , Ruang Bilik enggau Pemansang Komuniti Dato Sri Dr Noorul Ainur Mohd Nur, pemangku chairperson Gerempung Pemberita Commonwealth pampang Sarawak Alice Wee, Ketuai Sekretari kepala menteri Abdullah Saidol, Sapit Menteri Rampa Menua Len Talif enggau Presiden Gerempung Lawn Tennis Sarawak Dato Patrick Liew.