SIBU: Pemajik enggau pengelandik ke dikembuan Velda Gani nejuka iya megai gelar Kumang Gawai Sibu beserimbai enggau Pengerami Makai Lemai Gawai Dayak Sibu 2014 ke diatur ba Hotel Kingwood ditu, malam ensana.
Iya mujur ngalahka semilan iku pemekit ke bukai mai pulai perais mata duit t RM1,000 lalu disempulang trofi, selampai, jejumpang enggau hamper.
Penuduk lumur dua diempu Macprihelna Martin lalu iya mai pulai perais mata duit RM800, trupi, selampai enggau hamper.
Angelina Beatrice semina bepuas ati ba penuduk lumur tiga pekit nya lalu iya mai pulai perais mata duit RM600, trupi, selampai enggau hamper.
Macprihelna Martin sekali agi dipadu megai gelar Miss Photogenik nengah undi ari mensia mayuh.
Enggau tu iya mai perais mata duit RM150, hamper enggau gambar iya empu.
Perais bagi pekit Kumang Sibu 2014 disua Puan Sri Julai Mawan.
Ba pekit Keling Gawai Sibu 2014, gelar champian diempu Nyanggoh Macmorten.
Iya ngalahka tujuh iku pemekit ke bukai lalu mai pulai perais mata duit RM1,000, trupi enggau hamper.
Charles Jelian dipadu megai penuduk lumur dua, mai pulai perais mata duit RM800, trupi enggau hamper.
Penuduk lumur tiga diempu Randy Pangkas. Iya mai perais mata duit RM600, trupi enggau hamper.
Kelimpah ari nya, ba kategori pengelandik pemekit, Felix Nickel Francis ngempu gelar champian lalu ditangkan Randy Pangkas ba penuduk lumur dua enggau Alistair Philip ba penuduk lumur tiga.
Perais pekit Keling Gawai Dayak Sibu 2014 disua Temenggung Sir Adrian Ringgau.
Pengerami malam tu dipenyadi tuai pengabang ti mega Menteri Pemansang Rama enggau Presiden Gerempung Dayak Sarawak (SDNU) Tan Sri William Mawan Ikom.
Bela bisi datai maya tu iya nya tuai Gawai Dayak Sibu 2014 ti mega Chairperson Serakup Indu Dayak Sarawak (SIDS) Pampang Sibu Ir Alice Jawan.