BINTANGOR: Komiti Kereja Impian Rayat Parti Tindakan Demokratik (DAP) Pampang Bintangor udah nganjung uras enggau lutak ke diambi maya ngelasi tauka meresi parit enggau entali ai ba sebengkah palan genturung pendiau di belakang Gerija Methodist Bintangor kena 27 Jun tu tadi ngagai Opis Pelilih Mit Meradong enggau Julau (MDMJ), pagi kilah ensana.
Kaban Kunsil Nengeri (ADUN) Meradong Ting Tze Fui madah, parit enggau entali ai nya udah lama betebat kenyau ari taun 2010.
“DAP Pampang Bintangor suah mantaika penusah tu ngagai MDMJ baik nya nengah media, randau tauka memorandum.
“Tang nyentuk ke sehari tu penusah nya mengkang enda dikeibuh,” ku iya.
Tandu iya, pekara nya balat ngenataika penusah bukai lebih agi ngagai sida ke diau ba genturung pengentap pendiau besemak.
Ting madah, konteriktor ti megai tanggung pengawa meresi parit enggau entali ai di Bintangor jarang bendar ngereja pengawa sida nitihka sempekat ba kontrak sebedau tu.
Nambahka nya, ku iya, MDMJ mega dipeda enda ngibuhka ulah kontriktor nya lalu ngelakka penusah nya majak balat nyadi.
“Tu mandangka opis ti bekaul enda ulih bejalaika pengawa sida enggau manah.
“Rayat udah mayar macham bengkah pupu nyengkaum pupu pintu tiap taun ngagai MDMJ.
“Endang nyadi batang pengawa MDMJ ngena pupu nya enggau manah dikena ngereja pengawa meresi parit enggau entali ai nyengkaum semua pekara ke bekaul enggau pengelantang pengidup rayat ditu,” ku iya madahka baru.
Ting mega madah, orang megai penuduk ke besai ba opis nya anang semina duduk aja tauka semina nemu bejaku maya bisi aum aja.
“Manah agi angkat lalu ngereja pengawa ari ke semina duduk dalam opis sereta landik bejaku maya baum aja,” pia ku iya.
Berindik ari pekara tu Ting ngarapka rayat menua nya nyemetak agi nama bengkah ‘hak’ sida sereta berani mantaika penusah ke bisi nuntung diri empu.
Kelimpah ari nya, pengawa meresi parit enggau entali ai baka tu deka ditandu ninting hari Empat lalu uras enggau lutak deka dianjung ngagai MDMJ nyentuk MDMJ lengkas ngatur bengkah pengawa dikena mutarka penusah nya ari nyadi baru.