Dikarang Jacqueline David//
KUCHING: Ngenang jaku Kepala Menteri (KM) Datuk Patinggi Tan Sri Adenan Satem ti madah, gerempung ukai dikuasa perintah (NGO) di menua tu semina nemu nyidi penyalah tang enda mantu perintah munaska pengawa enda beradat, nerima timbal ari Presiden Serakup Graduet Dayak Sarawak (SDGA) Dr. Dusit Jaul ke deka nemu statistik mandangka penyampau orang ke udah ditangkap ketegal penyalah betebangka kayu batang enggau nadai pemendar di menua tu.
Iya madah, NGO ngembuan tanggungpengawa nyaup perintah sereta deka meda perintah bejalaika pengawa enggau efektif, ari nya mega bepelasarka sistem demokrasi, NGO di menua tu patut bejalaika pengawa nitihka atur ti patut.
“Chara ke manah, iya nya NGO patut meri timbal ngagai perintah sereta merambuka chara kena mutarka penanggul nya.
“Ba pekara ti dibantaika Kepala Menteri, ke madahka NGO enda mantu perintah mutarka penanggul betebangka kayu batang enggau enda beradat baka ti dipansutka nengah media alternatif enti nya tau dikearapka, pengamat ti deka ditemu semua orang iya nya nama kebuah nyentuk seharitu, nadai dipadah penyampau tauka sapa ke kena tangkap ngereja ulah ti enda beradat nya,” ku Dusit.
“Dini injin sereta perengka ti dikena orang ke ngereja ulah nya ke ditangkap raban penerit adat. Ba pekara tu, mensia mayuh bisi hak nemu, sekalika udah ditinggang ukum tauka nadai publisiti,” tandu iya.
Taja pia, iya muji Kepala Menteri ke udah mandangka pengamat iya deka munaska pengawa betebangka kayu batang enggau chara ti enda beradat di menua tu.
“Kepala Menteri patut nerima sukung ari semua rayat Sarawak. Pengabis nadai ke ulih tulung rayat nengeri tu iya nya ngeripot ngagai opis ke bekuasa enti tetemuka sebarang pengawa salah betebangka kayu batang enggau nadai beradat di menua tu,” ku iya.
Gerempung Bansa Dayak Sarawak (SDNU) nyukung penemu Kepala Menteri ke minta mensia mayuh besaup munaska ulah betebangka kayu batang enggau nadai pemendar.
“Ari nya, SDNU minta perintah maduka sekeda komiti ari gerempung ukai dikuasa perintah lebih agi NGO Dayak nyadi ejen perintah ngena ‘Renjer Kampung Kehormat’ baka ke ditumbuh ba taun 90 suba.
“Enda kelalu laun Kepala Menteri minta bantu NGO nengeri tu laban kitai agi ngembuan mayuh damun, temuda, tanah NCR ti bisi kayu berega baka Engkabang, Belian, Selangan, Tapang, ke patut digalau ngambika bisi dipeda rebak dudi,” ku ketuai publisiti SDNU, Ganchai Jinta.
Ganchai nandu, SDNU nyukung Kepala Menteri mulaika kuasa penuh ngagai Opis Kampung ari ti meri peluang ngagai kompeni ngarika perintah bejalaika atur enggau raban penerit adat.
“Ulah betebangka kayu batang enggau nadai beradat tu bepun ari kompeni ti ngarika perintah bejalaika pengawa ke enda betul lalu balat amat mulaika pengerugi ke rayat menua pesisir ti lenyau engkabang, tapang, kebun, temuda, damun ti ngujungka pengerusak rampa menua sereta ngamahka ai sungai,” ku iya.
Ayan ba ‘The Borneo Post’ ensana, Kepala Menteri bisi ngutuk NGO ke semina nemu bejaika perintah tang nadai meri sebarang perambu ti menyana ke tau dikena mutarka ulah ti enda beradat.
Berebak enggau penemu ti dipansutka Adenan, sekeda NGO madah, Kepala Menteri, naka ke diatu bedau datai ba tikas ke chukup mujur mutarka ulah betebangka kayu batang enggau enda beradat.
Berindik ari nya, Adenan dalam jaku iya ba sebengkah atur pengawa madah, iya ngarapka NGO menua tu ulih bersaup enggau perintah mutarka penanggul nya.
“Aku minta NGO mantu perintah mutarka penanggul betebangka kayu batang enggau nadai pemendar. Sekeda NGO semina landik mejah perintah tang lebuh dipinta nulung sida enggai, ku Adenan.
“Anang semina nyalahka perintah, diri empu mega patut mantaika chara dikena mutarka penanggul nya,” tandu Kepala Menteri.