KAPIT: Menteri Pemansang Tanah Tan Sri Datuk Amar Dr James Jemut Masing udah minta raban Opis Tanah enggau Survei (L&S) bejalaika pengawa nentuka garis adan entara tanah perintah enggau tanah NCR (Tanah Adat Bansa Asal) sereta enggau semua tanah di Sungai Kain, Baleh dikena mutarka penangul status tanah nya.
“Aku enda nyalahka raban kunteriktor (pengawa nebang kayu) tauka Opis Kampung Sarawak (SFC).”
“Aku pechaya sida enda ulih tagang ketegal nadai seiku berani madah ngagai sida kayu engkabang enda tau ditebang sereta dijual.
“Taja pia, iya dikemendarka enti pengawa meresi kampung. Batang pengawa meresi kampung dikemendarka enti bisi permit pengawa pemansang di tanah NCR tu,” ku Masing.
“Bisi dua bengkah ejensi ngembuan kaul enggau pekara tu (betalatka garis adan entara tanah); iya nya SFC enggau L&S.
“Raban ari SFC tu udah bejalaika tanggungpengawa sida enggau manah, pengawa nagang ngereja kayu belalai di serata menua tu.
“Diatu, L&S meseti lengkas bejalaika pengawa nentuka garis entara tanah perintah enggau tanah NCR.
“Pekara tu beguna bendar dikena nyeliahka penangul betalatka pekara nya majak nyadi.
“Enti L&S udah nemu garis entara menua udah nya SFC ulih bejalaika pengawa sida nentuka enda ngerenchah ngagai tanah NCR.
“L&S enda patut semina duduk enkutung dalam opis aja tang patut nyereta pengawa bejalai meresa ngagai palan nya baka ti udah dipejalaika SFC,” ku Masing bejaku ngagai raban pemerita dalam sidang pengarang sepengudah iya mulai kediri ari pejalai ngabas raban sub-kunteriktor enggau staff SFC ari indu opis.
“SFC tu ulih bejalaika pengawa enggau lengkas tang sida enda ulih ngereja pengawa nya kediri aja.
“L&S patut bekerejasama bejalaika pengawa ngabas sereta meresa diri empu nentuka status tanah sereta ngabas peranak rumah panjai sereta meri penerang ngagai sida bejaul enggau garis entara tanah ke bendar iya dikena nyeliahka penangul betalatka pekara nya.
“Kerejasama entara dua bengkah enjensi tu beguna bendar dikena mutarka penangul tu.
“Penangul tu meseti diputur enggau lengkas. Nya alai sehari tu (lemai Hari Lima) iya bisi ngangauka raban pemerita enggau raban pengari ari peranak rumah panjai bejalai ngabas ngagai palan penangul tu nyadi.
“Aku bisi betemu enggau kunteriktor sereta staff ari opis indu SFC ke udah meri penerang ngagai aku. Sida mega nunjuka isu OT ari SFC ngagai aku. Diatu, aku udah nemu silik pasal semua pekara tu,” ku iya nerang.
“Enti sema dalam kandang tanah Perintah, nya ukai dalam kuasa aku sereta nya entara raban kunteriktor enggau perintah.
“Taja pia, enti iya tanah NCR, sida patut nganjung peminta ngemendarka ngagai Opis Menteri Pemansang Tanah. Naka diatu, aku nadai udah nerima sebarang surat peminta bejalaika pengawa ngemansangka tanah NCR ari sebarang opis, semina seiti aja udah ulih pemendar iya nya di kandang menua Oyan,” ku iya nandu.
Masing manta pengawa nyukat tiap perimeter tanah nya beguna bendar. Enti enda penangul betalatka status tanah nya deka nyadi. Iya ukai semina nyadi penyaru tauka isu bekaul enggau tanah NCR aja tang kelebih agi iya nyengkaum tanya nentuka status tanah nya.
Maya di palan penangul tu nyadi, Masing udah diterang tiga iku raban Pemesai ari indu opis SFC, SADU (System Application Development Unit) diketuai Ali Suut, Awang Enjah Awang Kepli enggau Salleh Mahmud.
Pengari ari Kunteriktor iya nya Zaee Roslee enggau sub-kunteriktor diketuai General Menijar John Siew.
Sentara nya John Siew nerang ngagai Masing sida nitihka langur ari permit dikeluarka SFC sereta raban ejensi ti bekaul enggau pekara nya.
Sida ngereja pengawa nebang kayu dalam kandang menua tanah perintah di Ulu Sungai Kain, Baleh.
Urung 18 kilometer penyauh ari Rumah Gare Timbang enggau Rumah Ensong. Iya mega udah nyuaka salin OT ngagai Pemesai SFC enggau Masing ngambika ulih bejalaika pengawa ti patut.