SIBU: Urung 10,000 iku temuai disadang deka ngulu Pengerami Ngemaduka Bayar Tol Jematan Lanang berengkah pukul 8.30 pagi tu (24 Mei).
Sapit Residen Sibu Dr Zulfar Yadi madah, pengerami tu deka dipenyadi Kepala Menteri Sarawak Datuk Patinggi Tan Sri Adenan Satem.
“Pengerami tu deka digulu bala temuai nyengkaum bala nembiak sekula, pengajar, ketuai opis perintah, raban pengereja pengawa perintah, ketuai raban bansa ari menua ke besemak kelimpah Sibu empu baka Bintangor, Sarikei, Kanowit, Julau enggau Pakan.
“Komiti pengatur bisi nyediaka 20 buah bas dikena ngangkut mensia mayuh ke ngulu pengerami tu,” pia ku iya maya berandau enggau pengarang berita maya pengawa ‘rehearsal’ ba palan pengerami, kemari.
Bela bisi dipeda datai ngulu pengawa tu iya nya Sekretari Politik Kepala Menteri Pau Kiew Chuang,
Zulfar madah, pengerami tu diatur begulai Opis Kepala Menteri, Opis Menteri Pemansang Infrastruktur enggau Penyambung, Opis Kereja Raya (JKR) enggau Opis Residen Sibu.
“Kelimpah kitai meri basa ngagai Adenan ngelai ngemaduka tol jematan tu, kitai mega bisi ngatur panggau pemerindang enggau pengawa nuchul bungai api,” ku iya madahka baru.
Berindik ari pekara tu, iya minta mensia mayuh ulih datai tumu agi sampal bela ngerami pengawa kelimpah ngayanka meri besai terima kasih ngagai Adenan ketegal udah ngaga pemutus ngemaduka bayar tol jematan nya.
Berebak enggau tu mega, Zulfar madah, Kaunsil Pengelikun Jalai Alun Sitak Sibu bela bisi ngatur kimpin pengelikun jalai alun ba sepiak tol nya sebedau penatai Adenan bejadika pengerami belabuh ari pukul 8.30 pagi.
“Kimpin tu deka dipenyadi Menteri Opis Menteri Pemansang Infrastruktur enggau Penyambung Dato Sri Michael Manyin Jawong lalu digulu Menteri Wang II Dato Sri Wong Soon Koh.