KUCHING: Parti Sa’ati Rayat Sarawak (SUPP) deka mantu pengatur gempuru Sarawak for Sarawakians (S4S) sereta Gerempung Iban Dayak Sarawak (SADIA) nengah undang-undang, enti sema luyar mutus deka nyaman sida ketegal ngatur pengawa begempuru ngenang Hari Sarawak Merdeka kena 22 Julai di Padang Song Kheng Hai tu tadi.
Sekretari SUPP Pelawan Michael Tiang madahka enti sema luyar mutuska deka nyaman S4S enggau SADIA ketegal kededua gerempung tu ngatur gempuru ‘722 Sarawak Freedom and Independence Walk’ ti digaga bedau lama tu tadi.
Tiang madah sebedau tu Sekretari Jeneral SUPP Dato Sebastian Ting bisi madah ngagai pemberita, iya nya SUPP enda lantang ati enggau jaku Ketuai Polis Menua ke deka mansik sereta nyaman pengatur gempuru ‘722 Sarawak Freedom and Independence Walk’.
“Laban nyadi sebuah parti politik ke bepalan di Sarawak, SUPP nyukung pengawa ‘722 Sarawak Freedom and Independence Walk’ nya laban parti kami pechaya 22 Julai nya mai reti ke besai endar sereta ngasuh rayat menua tu temegah ati ke ulih sama-sama begempuru lalu nyambut hari ke besejarah nya,” ku Tiang madah nengah ‘whatsapp’ ti dikirum iya ngagai Bilik Berita ditu.
Diatu, ku iya, pengatur pengawa ‘722 Sarawak Freedom and Independence Walk’ nyangka deka betapi enggau penusah deka dibechara ketegal pengawa sida iya ngatur atur pengawa nya.
Nangkan nya, ku Tiang SUPP deka numbuhka raban undang-undang sida iya ti betuaika iya empu enggau Sekretari Pemadah enggau Publisiti Indu Opis SUPP Milton Foo, sereta bala luyar bukai ari parti nya empu, udah dilalau besedia meri bantu dalam sukut undang-undang sereta sukung ngagai bala pengatur ‘722 Sarawak Freedom and Independence Walk’.
Iya nandu baru, taja pan pengatur pengawa nya udah mujur mandang ngagai opis kandang menua, iya nya gempuru ‘722 Sarawak Freedom and Independence Walk’ digaga enggau likun sereta nadai betapi enggau sebarang penanggul, sida iya (pengatur) agi deka ditukik polis.
“Enti nya bansa nya, SUPP pechaya udah maya iya pangku pengawa Kepala Polis Sarawak nya diberi ngagai orang Sarawak empu.
“Sebaka enggau Kepala Akim Kort Besai Sarawak ti dipangku ulih orang Sarawak empu ke nemu agi pasal adat, undang-undang sereta atur menua tu.
“Lalu baka nya mega, enti iya endang Kepala Polis ari Sarawak empu, nemu agi madah ngagai Bukit Aman gaya menua tu lebuh sida iya bejalaika pengawa sida iya nyadi polis nitihka ungkup undang-undang,” ku iya.
Kelimpah ari nya, dalam jaku iya dalam pesan jaku pandak nya mega ngelalau mensia mayuh anang sanggu betelefon nuju Indu Opis SUPP ngena lumur 082-246999 enti bisi rayat Sarawak ke nyereta gempuru ditan tauka ditukik polis.
“SUPP besedia ba dedini kort nyaup rayat Sarawak betemu enggau opis kandang menua, enti nya nyau datai ba tikas nya,” ku Tiang.