Sekeda chalun baru bisi bediri nukar chalun lama ke madahka diri deka ngetu ari pengawa politik
KUCHING: Parti Pesaka Bumiputera Bersatu Sarawak (PBB) udah besedia napi Pengawa Bepilih Kunsil Nengeri (PRN) ke dijangka deka diatur enda lama agi.
Presiden iya ke mega nyadi Chairman BN Sarawak Datuk Patinggi Tan Sri Adenan Satem ngemansutka pekara nya pengudah tembu Aum Kaunsil Besai (MKT) parti bepalan ba Indu Opis PBB, Jalai Bako ditu, kemari.
Adenan madahka ba PRN tu ila, dipelabaka bisi chalun baru deka bediri ngena tikit Barisan Nasional (BN) nukar orang lama.
Iya mega madahka nadai Kaban Parlimen (MP) deka bediri ngena tikit Kunsil Nengeri (DUN).
Timpuh DUN ke diatu deka dipadam sebedau 20 Jun 2016.
Ba aum MKT PBB ke diatur pengelama lebih dua jam kemari berandauka mayuh pekara dikena sida nyikap diri napi PRN ke deka datai tu.
“Aum kami sehari tu mayuh bejurai pasal strategi, kelebih agi ti deka dikena maya PRN, strategi ke patut dititih sereta pekara bukai.
“Aku enda ulih madah nyemetak ngagai kita baka ni strategi kami, tang iya seiti strategi silik ungkup PRN,” ku Adenan.
Sida pemesai PBB, ku iya mega bisi bejuraika sentang kemaya PRN patut diatur, tang Adenan nadai madah kemaya haribulan nya semina nyebut sebedau 20 Jun taun baru.
“Aku enda ulih madah kemaya PRN nya diatur, tang sigi ditetapka sebedau 20 Jun 2016.
“Pengawa bepilih tetap deka diatur, ni maya ke betul ila dia mih maya ngatur iya (PRN),” ku iya.
Adenan mega bisi ditanya pasal 11 kerusi DUN baru tang iya nadai nyaut enggau nyemetak.
Berebak enggau nya, iya madahka kaban MKT bela setujuka polisi enggau pemutus ke udah ditetapka iya.
“Terima kasih ngagai ngagai MKT laban ke udah betunggang nyungkung aku,” ku iya.
Penyampau chalun baru maya PRN tu ila, umbas iya ” “ pemayuh, ku Adenan.
“Ninting kali pengawa bepilih endang bisi chalun baru, tang ke sekali tu umbas iya pemayuh.
Sekeda ditukar laban madahka diri deka ngetu ari pengawa politi,”ku iya.
Kelimpah ari nya mega, pemayuh kaban PBB di serata menua tu bisi udah manggai urung 300,000 iku.
Adenan ngasaika BN deka menang besai ba PRN ke sekali tu.
“Aku ngarapka baka nya, Petara nulung tang taja pia, pekara tu enda ngasuh aku lelawa, tang ngasuh aku baruh ati,” ku iya.
Ngagai parti komponen BN bukai, sama udah dilalau bela nyikap diri empu,ku iya.
“Aku udah suah madah ngagai parti komponen BN bukai, ngasuh sida iya besedia belama, kelimpah ngemutarka penyarut dalam parti diri empu,” ku iya.
Ba pengawa PRN ke sekali tu, pemayuh kerusi Kunsil Nengeri bisi 71 kerusi, lalu enti dipegulai enggau 11 buah kerusi baru, penyampau iya manggai 82 kerusi.
Naka tu, parti komponen BN semina PBB, Parti Sa’ati Rayat Sarawak (SUPP), Parti Rakyat Sarawak (PRS) enggau Parti Demokratik Progresif Sarawak (SPDP).
Kelimpah ari nya, parti Tenaga Rayat Sarawak (TERAS) enggau United People’s Party (UPP) netapka sida iya parti ke bekaling enggau BN, ti betuaika Menteri Pemansang Pengawa Rama Tan Sri William Mawan Ikom (Presiden Teras) enggau Menteri Wang Kedua Dato Sri Wong Soon Koh (Presiden UPP).
Sama bisi ngulu aum tu Sapit Kepala Menteri ti mega nyadi Sapit Presiden PBB Datuk Patinggi Tan Sri Alfred Jabu, Sapit Presiden Kanan ti mega nyadi Menteri Kebun Bedandang Besai enggau Komoditi Malaysia Datuk Amar Douglas Uggah enggau Datuk Amar Abang Johari Tun Openg (ti mega nyadi Menteri Pengawa Berumah sereta Menteri Pengawa Dagang Temuai) sereta pemesai bukai.
Pengujung aum MKT PBB ditangkan enggau pengerami Ramah Tamah Aidilfitri ti digulu urung 500 iku kaban PBB ke bukai.