SRI AMAN: Presiden Parti Rakyat Bersatu Sarawak (SUPP), Senator Datuk Profesor Dr. Sim Kui Hian minta rayat ba sitak Kunsil Nengeri (DUN) Simanggang terus betunggang sukung ngagai Kaban Kunsil Nengeri (ADUN) Simanggang, Datuk Francis Harden Hollis nyadi chalun Barisan Nasional (BN) ba pengawa bepilih kunsil nengeri (PRN) ke deka datai.
Kenu ku iya, pengawa milih Harden nyadi chalun BN di Simanggang maya PRN ke-11 ke deka datai ila endang sebengkah pemutus ke engkeman ngambika pemansang di sitak Simanggang terus betampung udah tu.
“Kitai ari SUPP ngarapka rayat sereta pengundi di Simanggang terus betunggang sukung ngagai Harden laban iya ulih mai mayuh pemansang sereta ubah ngagai rayat ditu, udah tu.
“Kitai mega udah meda sekeda pemansang ke udah dipejalaika di Simanggang nyengkaum ngemanahka Loji Ai Beresi Bayai di Bayai, pengawa ngaga sepital Sri Aman ke benung masuk fasa kedua kelimpah mayuh mega projek bukai ke benung digaga ditu,” ku iya.
Sim madah munyi nya rambau Pengerami Merarau nyerumba Pengerami Kuih Bulan 2015 diatur Gerempung Ketuai Raban Bansa China Bagi Menua Sri Aman bepalan ba sebengkah hotel ditu, kemari.
Iya mega madah, kelimpah pemansang di Mengeri Simanggang, mayuh bengkah pri\ojek bukai ke benung dikemansangka Harden di kandang menua pesisir nyengkaum projek jalai rumah panjai, jematan enggau balai raya nyengkaum ke digaga di menua Undop.
“Semua projek nya dipejalaika Harden nengah perintah Barisan Nasional (BN) lalu Harden mega udah merambu sekeda projek bukai nyengkaum ngaga Jalai Alternatif ari Entulang rembus ke Kampung Muhibbah enggau ke menua Kejatau,” ku iya.
“Laban ke nyadi Presiden SUPP, aku meri terima kasih ngagai Kepala Menteri, Tan Sri Adenan Satem laban ke udah madahka Harden nyadi chalun BN di Simanggang sebedau tu.
“Nya alai, kitai chukup begunaka seiku pengari rayat ke baka tu bagas ngelawa rayat sereta mendingka penanggul ke sitak ke dijaga iya,” ku iya.
Nangkan nya, Harden mega bisi bejaku ngelalau rayat terus nyukung Kepala Menteri, Tan Sri Adenan Satem nyadi ketuai ngiring ba renggat perintah nengeri.
“Beri mih sukung penuh ngagai Kepala Menteri kitai ngambika menua Sarawak lebih maju agi ari diatu.
“Sekumbang iya udah dipilih nyadi Kepala Menteri Sarawak, mayuh ubah enggau pemansang udah dipeda kitai, nya alai, sukung ari kitai ngagai iya endang beguna amat,” ku iya.
Sama bisi datai Temenggung Sii Toh Peng, Temenggung Sauel Lawen, Pemancha Micheal John, bala Kapitan, raban Tuai Rumah sereta ketuai ke bukai.