KUCHING: Parti Tindakan Demokratik (DAP) andal ulih ngerampas penuduk ke dipegai Barisan Nasional (BN) di menua pesisir maya pengawa bepilih nengeri (PRN) ke deka datai seraya ngurangka majoriti dua per tiga pemujur BN di sitak nya.
Sekretari Jeneral DAP ti mega nyadi Kepala Menteri Pulau Pinang Lim Guan Eng madah pekara lumur satu ke patut dikemeratka di sitak menua pesisir iya nya bekaul pengidup rayat.
“Nya nyengkaum beratika pengidup rayat di menua pesisir ke enda dikeibuh pengelama 52 taun ke udah. Kati asai…dalam timpuh nya, nadai api, ai? Sigi enda ulih diterima pengelama nya,” ku Lim.
Iya madah munyi nya lebuh dirandau pemberita maya bejadika Konvensyen DAP Nengeri Ke-17 ti bela digulu Chairman DAP Sarawak ti mega nyadi Kaban Parlimen (MP) Bandar Kuching Chong Cheng Jien, raban ketuai DAP sereta urung 100 lebih penyereta ari serata nengeri tu, kemari.
Lim nandu, nyema penyakal ulih nyendiaka ai enggau karan, kati perintah diatu (BN) enda ulih ngaga pengawa nya dalam kandang 52 taun, reti nya, manah agi penyakal megai Sarawak, ku iya.
“Enti penyakal ulih nyendiaka api enggau ai nama kebuah Perintah BN enda tekereja ke pengawa nya kandang 52 taun ke udah, reti nya manah agi penyakal megai Sarawak,” ku iya seraya ngenang pasal manifesto PRN ke sekali tu, ‘Go Rural’.
Kenu ku Lim, pekara berat iya nya bekait enggau penanggul ekonomi ke udah raya.
“Peratika gaya pemansang di Pulau Pinang enggau Selangor. Di Pulau Pinang, kami udah mandangka pemansang ke dijapai ungkup semua bansa,” ku iya.
Penyadi di Semenanjung Malaysia bekaul enggau duit RM2.6 billion tetap bisi mangka Sarawak, ku iya.
“Sapa ngumbai nadai mangka Sarawak? Peratika rega Ringgit (RM) kitai udah jauh amat turun, diatu rega RM1 sebaka enggau USD4.30.
“Pangka ari GST, ngenusah rayat. Chara manah ungkup ekonomi iya nya ketuka GST. Malaysia enda bankrap enti nadai GST,” ku iya nandu Malaysia teulihka penguntung ari GST kena mayar utang, manggai RM39 Billion naka diatu.
Ngenang penanggul sekeda ketuai DAP ditagang masuk ke Sarawak, baka MP Petaling Jaya Utara Tony Phua enggau MP Puchong Teresa Kok, Lim nyemaka Kepala Menteri Sarawak Datuk Patinggi Tan Sri Adenan Satem sebaka enggau penemu Menteri Besai Datuk Seri Najib Tun Razak.
“Nya mandangka Kepala Menteri Sarawak nadai bida enggau Menteri Besai. Kami ukai ngelanggar undang-undang menua tu, laban nya sebagi ari hak Perintah Sarawak.
“Tang anang sampai nagang pemesai kami. Nama penyalah sida? Sida kitu ukai deka ngaga penyarut. Sida iya enda kala ngemba deka nampar tauka ngemba boikot dagang orang,” ku iya.
Sebedau nya, Chong, bisi madahka nyema BN Sarawak menang besai maya PRN tu ila, nya agi ngetanka pegai Najib nyadi Menteri Besai Malaysia, kelimpah setujuka nengeri tu agi nyadi deposit tetap BN.
Kelimpah ari nya, iya madah DAP bisi penegap sereta nerima sukung ari rayat.
“Kami patut netapka tagit ke besai agi lalu enggai ngelakka BN nyapai juluk sida maya PRN tu ila.
“Kami udah netapka tagit kami nulak 2/3 (dua-per-tiga) majoriti di Kunsil Nengeri (DUN) Sarawak lalu ngarapka mayuh agi pemujur deka dijapai,” ku iya.