SAUP ARI DAP: Leon (kiba) begambar enggau penyereta program Mikro Kredit DAP ari Ng. San.
KUCHING: Program mikro kredit ke dituku DAP Sarawak kenyau bulan Januari 2014 sekali agi mulaika pemaik ngagai peranak menua pesisir di Sri Aman.
Serak tu, peranak ari rumah panjai Nanga (Ng.) San nerima 100 iti paung sawit ngambi tau dikena ngepunka kebun sawit ba tanah NCR diri.
Pengawa nyuaka paung nya bedau lama tu tadi dikemujur Chairman DAP Sri Aman Leon Jimat Donald.
Program mikro kredit ku Leon, sebengkah inisiatif DAP Impian Sarawak kena mantu ngangkat ekonomi peranak menua pesisir.
“DAP Sarawak nengah inisiatif Impian Sarawak mungkalka program bekebun mit sawit ungkup peranak menua pesisir.
“Tu sebengksh program mikro kredit ke alai tiap iku penyereta diberi 100 paung sawit enggau enda bebayar ngambi sida tau numbuhka kebun sawit.
“Penyereta semina dipinta mayar pulai mikro kredit pengudah dua taun iya nya maya sawit sida udah ngemansutka buah,” ku Leon.
Iya ke mega Mandal Chairman DAP Sarawak pechaya program nya ulih nyaup nambah penatai pemisi penyereta ke alai sida diberi paung ti manah ke ditanam ba tanah NCR diri.
Program tu ku Leon, diungkup ngagai sida ke enda diberi MPOB paung sawit pengudah Perintah Nengeri enda meri permit ngagai ejensi ke dikuasa Opis Menteri Kebun Dandang Besai enggau Komoditi nya numbuhka kebun ba tanah NCR.
Semina sida ke bisi pala tanah aja tau nyereta program bekebun ke disedia MPOB, tandu Leon.
Seiku peranak Nanga San, Jalir anak Bel madah, ketegal penanggul nya lalu ditambah enggau pengeran numbuhka kebun sawit, sida ngalih minta bantu ngagai DAP.
“Rega paung sawit balat mar maya ke diatu ke alai kami semina ulih bemimpi aja numbuhka kebun sawit.
“Tang diatu kami berasai gaga pengudah diberi peluang DAP Impian Sarawak nyereta program ke dikearap ulih nyungkak penatai pemisi peranak menua pesisir,” ku Jalir.