Dikarang Rengenyan Labang //
KUCHING: Institiut Pemansik enggau Pemansang (R&D) deka ditumbuhka dikena ngangkatka bidang R&D di nengeri tu seraya matak pengerindu raban nembiak ba bidang nya.
Menteri Muda Rampa Menua, Datu Len Talif Salleh madah, nya mega sebengkah ari chara dikena narit ati raban nembiak nengeri tu ngambi bidang R&D, kelimpah ari dikena ngempuruka semua raban R&D ba seiti perabung.
Iya madahka pekara nya deka dikerandauka silik enggau ejensi perintah nengeri ti bekaul baka Opis Tanah enggau Survei, Sarawak Forestry Corporation, Opis Kampung, Opis Betanam Betupi enggau kebukai ngambika sebuah institiut R&D ulih ditumbuhka ambika chunto baka Commonwealth Scientific and Industrial Research Organization.
“Keretas kereja (kena numbuhka institut R&D) benung dilangkar, deka dikerandau dalam kabinet ngambika ulih dikena ba nengeri tu lalu struktur iya disediaka perintah nengeri.
“Dikearapka penumbuh institut R&D di nengeri tu ulih meransang sereta ulih matak mayuh agi raban nembiak ngambi bidang R&D, laban diatu penyampau sida jauhy kurang.
“Dulu suba bakani chara kitai deka narit ati ngambika mayuh agi raban nembiak milih bidang R&D kala dikerandauka, nya alai kitai nguji ngelangkar struktur sereta numbuhka institiut R&D di nengeri tu, dikearapka ulih narit ati raban nembiak masuk bidang tu.
“Penumbuh institiut nya mega chara dikena kitai ngenukuka R&D nengeri ulih diangkat sereta dikemanahka agi ngagai renggat ke tinggi agi laban enti dibandingka enggau diatu tetiap ejensi bisi R&D ke diri empu, tang semua pansik ke dipejalaika enda dalam tauka silik,” ku iya ti bedau deka meri penerang silik pasal pekara nya.
Len mansutka pekara nya dalam aum pengarang berita pengudah bejadika Regional Taxonomy and Ecology Conference 2015 (TEC 2015) ti diatur Fakulti Sains dan Teknologi Sumber, Universiti Malaysia Sarawak (UNIMAS) ba sebuah hotel ditu, kemari.
Menteri Muda ba Opis Kepala Menteri (Pengatur Pemansang Pelajar Teknikal) lebuh ditanya pemayuh raban nembiak dalam bidang R&D lebih agi dalam taksonomi iya madahka, agi mimit.
“Nya kebuah kitai meransang raban nembiak kitai ke nampung pelajar ngambi bidang tu R&D, tang bidang tu begunaka pengerindu enggau komited kelimpah ari penemu,” ku iya.
Ditanya nama kebuah raban nembiak kurang bepengerindu dalam bidang R&D ke lalu ngujungka penyampau raban nembiak mimit dalam bidang tu, iya madahka, nya ketegal ari ti nadai dikemeratka ba renggat sekula ngujungka kurang pengerindu ngagai rampa menua, utai idup enggau utai tumbuh.
“Dipelabaka mega skala gaji bidang tu nadai jauh bida enggau gaji pengawa bukai, lalu pekara tu patut diperatika baru dikena narit raban nembiak nya pemansik enda ngira pekara ti dipansik.
“Tang deka nyadi pemansik tu begunaka pengerindu enggau komited ukai semina ketegal skala gaji,” ku iya madahka nya entera kebuah raban nembiak kurang bepengerindu dalam bidang nya.
Sama bisi dalam aum pengarang berita kemari, Naib Chanselor UNIMAS Professor Datuk Mohamad Kadim Suaidi enggau ke bukai.