KUCHING: Rayat di nengeri tu ke suah kena bah dipinta nyikap diri ari penusah nya lebih agi ai pasang raya seharitu ke dipelabaka manggai 6.2 meter peninggi.
Menteri Pemansang Orang Indu, Ruang Bilik enggau Raban Bansa, Datuk Seri Rohani Abdul Karim madahka, mensia mayuh ti suah napi penusah nya dilalau nitihka atur piak bekaul dikena nyeliah sebarang penanggul bukai.
“Kitai patut nyikap diri betapi enggau ai pasang raya pagila (seharitu), enti diasuh misah ngagai palan pengenduh sementara enda tau enda jampat pindah, laban kitai enda nemu nama utai ke nyadi.
“Ke enda tau enda nyimpan dokumen ti pemadu beguna, gari ti chukup, ubat sereta utai bukai ti beguna patut disimpan sereta dibai lebuh diasuh bepindah,” ku iya lebuh dikerandau ba sebengkah aum pengarang ditu, kemari.
Kelimpah ari nya Sapit Chairman Komiti Pengatur Penusah Ngenyit Nengeri Sarawak Datuk Misnu Taha dalam aum pengarang berita kemari madahka penyampau orang ke dipindah ngagai palan pengenduh sementara di Kuching enggau Bau iya nya 2,685 iku.
Iya madahka kemari penyampau nya bisi nambah 2,068 iku orang dibandingka 617 iku orang dirikodka 4.20 lemai ensanus.
Nitihku iya, penyampau nya mungkur 651 iku ruang bilik ti diau ba 20 palan pemindah sementara ti dibuka kenyau 7 Februari tu tadi.
“Naka pukul 10.30 pagi tadi (Hari Dua) bisi 2,685 iku orang ngenduh ba 20 palan pengenduh sementara ti dibuka ba pelilih menua Kuching enggau Bau.
“Penyampau nya mungkur 651 ruang bilik dibandingka enggau 134 ruang bilik lemai kemari (ensanus, Hari Satu),” ku iya ti dulu ari nya nyadi chairman aum Komiti Pengatur Penusah Ngenyit Nengeri ba Unit Keselamatan Negeri ditu.
Bepelasarka penerang ari Opis Pengemata Gaya Hari, Misnu madahka, ujan dipelabaka bisi kurang dalam timpuh beberapa hari agi berengkah seharitu (kemari).
Taja pia, peranak nengeri tu dilalalu seruran besedia betapi enggau sebarang penanggul bah lebih agi ke diau nebing sungai.
“Udah tu dipelabaka ujan memesi bepelasarka penerang ari Opis Pengemata Gaya Hari, tang kitai tetap deka bejaga ari sebarang utai ti enda ulih disadang. Ngarapka ujan enda bangat laban nya ulih ngasuh bah,” ku iya.
Nitihku Misnu, sistem baraj Sungai Sarawak udah dibuka belama dikena nyeliahka takung nya enda ulih napi pemayuh ai tasik ketegal ai pasang raya.
Kelimpah ari nya, Misnu madahka naka ke diatu nadai penusah bebadi diripotka.