Enam iku ari UPP, siku ari SUPP udah ditetapka nyadi Chalun Terus BN ba aum pengarang berita kemari
// Dikarang Jacqueline David //
KUCHING: Tujuh iku agi Chalun Terus Barisan Nasional (BN) udah ditetap Kepala Menteri Datuk Patinggi Tan Sri Adenan Satem di Opis Kepala Menteri di Wisma Bapa Malaysia kemari.
Tujuh iku chalun nya semua ari United People’s Party (UPP), iya nya Ranum Mina (Opar), Datuk Dr. Jerip Susil (Mambong iya nya sitak ke kumbai Bengoh suba), Dr. Johnical Rayong anak Ngipa (Engkilili), Datuk Tiong Thai King (Dudong), Dato Sri Wong Soon Koh (Bawang Asan) enggau Dato Hii King Chiong (Pujut).
Siku agi chalun, Datuk Pau Chiong Ung ari Parti Demokratik Progresif Sarawak (BN-SPDP) ke deka bediri atas tikit Parti Sa’ati Rayat Sarawak (BN-SUPP).
“Semua sida tu deka ningkilka diri ari UPP laban tu siti atur teknikal nitihka konstitusyen BN ke enda tau enda di titihka. Nambah enggau nya, sida pan nyadi chalun terus BN,” ku Adenan madah ba aum media di opis iya di Wisma Bapa Malaysia ditu, kemari.
Pengudah Pengawa Bepilih Kunsil Nengeri ke-11 (PRN ke-11) tu ila, Adenan madah semua sida tu ulih milih bagi parti komponen BN ke deka dipasuk sida.
“Sida bisi hak milih bagi parti ti deka dipasuk seagi-agi sida talukka BN,” ku iya.
Ba tanya pengarang berita,sekalika chalun terus BN tu ditetapka masuk sebarang bagi empat komponen parti BN, lalu ukai parti bukai, ku Adenan: “Aku nadai madah munyi nya…tang sida enda tau enda nitihka atur BN,” ku iya.
Dalam aum media nya mega, Adenan ditanya pasal kebuah iya lubah ngaga pemutus sapa bagi chalun BN tauka chalun terus BN ke deka bediri di sitak Pelawan, Marudi, Tasik Biru enggau Meradong.
“Chalun ke sitak Pelawan enggau Meradong, bisi sekeda pekara ke patut diputarka dulu sebedau nyapai konsensus ke patut digaga.
“Semua chalun BN tauka chalun terus BN ke bedau dirintaika nama sida deka dipadah sebedau hari ngantung nama, nyengkaum Meradong enggau Pelawan,” ku iya.
Chalun Tanjong Batu, Pau ke kala nyadi kaban SPDP sebedau tu, lalu maya PRN ke-11 tu deka bediri atas tikit SUPP, Adenan ditanya sekalika Pau patut ningkilka diri ari SPDP dulu sebedau bediri, ku iya:
“Pelaba aku, iya (Pau) patut ningkilka diri dulu ari SPDP,”ku iya.
Presiden SPDP, Dato Sri Tiong King Sing lebuh ditelefon pengarang berita ngambika nyaut pasal pekara tu enda ulih dikerandau laban ke agi dalam aum bukai.
Kelimpah ari nya, chalun terus BN (TERAS) enggau SPDP mega diputar dalam timpuh ke semak tu, urung dalam kandang minggu tu, ku iya.
“Dalam kandang minggu tu, aku deka ngerintaika chalun terus BN (TERAS) nyengkaum chalun BN ari SPDP, pengabis laun pan sebedau hari ngantung nama.
“Beri sida timpuh ke chukup dulu mutarka sekeda dokumen ke patut, sebedau hari ngantung nama,” ku iya.
Adenan mega ditanya sekalika Komisyen Pengawa Bepilih (SPR) bisi udah madah ngagai iya pasal hari ngantung nama enggau hari ngundi, ku Adenan, SPR enda ibuh madah ngagai iya tang patut madah ngagai mensia mayuh kelebih agi pengundi.
“SPR enda ibuh madah ngagai aku tang madah ngagai mensia mayuh tauka pengundi pasal maya hari ngantung nama sereta ngundi,” ku iya ke bepuas ati enggau rintai nama chalun terus BN ari UPP.
Adenan nandu baru, diatu semua chalun BN, sereta chalun terus BN nyauka tembu, iya ngelalau umbas agi ‘betimbakka meriam’ ngagai pangan diri tang tujuka ‘meriam’ nya ngagai penyakal.
“Diatu semua chalun BN tauka chalun terus BN nyauka abis dirintai, aku ngarapka kita badu agi ‘betimbakka meriam’ ngagai pangan diri tang tuju ‘meriam’ nya ngagai penyakal.
“Nambah enggau nya, aku ngarapka nadai agi penyarut nyadi antara kita…Semua senyata diatu dituju ngagai penyakal,” ku iya.
Ba atur pengawa nya kemari, semua chalun terus BN bisi dia magang, semina Pau ke nadai dipeda ba aum media nya.