KENANG KITAI: Mabong (duduk dua kiba) enggau Churchill (duduk kanan) sereta Deen (duduk tiga kanan) enggau Rizal (duduk dua kanan) begambar enggau raban orang ti rindu bekuntau sereta raban Nika enggau Asadia.
KUCHING: Kuntau Iban deka dipandangka dalam siri dokumentari kelimpah ari pengelandik ngenanka diri ke nyelai ti dikembuan sekeda komuniti etnik di Malaysia.
Nitihka pemadah ari Ketuai Akademi Sadia, Mabong Unggang madahka sekeda ari orang ke endang bepengelandik dalam Kuntau Iban ti digelar ‘Guro’ enggau pelatih sida deka enggau ba pengawa ngaga filem ke deka digaga di menua tu, ujung bulan tu ila.
Rintai sida ke landik ari menua tu empu, iya nya Guro Patrick Tuat, Guro Kiai enggau Guro Tuai Rumah Solomon Achu, ku iya deka ngarika ‘Kelang’ sida iya empu.
Mabong ti mega sekretari protem Gerempung Kuntau Iban Kebangsaan (NIKA) madahka sida ke landik tu deka mandangka pelasar bungai kuntau ‘Lang Ngindang’ ‘Dam Dam Spring’ enggau ‘Spring 24’, iya nya sebengkah ari Kuntau Iban.
Kelimpah ari tiga iti bungai nya,bisi mega bungai ke bukai baka Betawi enggau Minangkabau, ku iya.
Iya madah, mayuh ari sukut Kuntau Iban baka miring enda dipandangka ba mua orag mayuh.
Bisi urung 20 iti ‘Kelang’ (palan latih) di serata nengeri Sarawak lalu tebal agi ari palan tu ngenggaika publisiti.
Kelimpah ari nya, iya madah Kuntau Iban enda chukup enti enda disempulang enggau taboh Kuntau, ku iya.
Mabong nandu baru, pengudah iya sama ngulu aum begulai enggau orang ke bisi pengerindu ba Kuntau Iban sereta Dermaga Seni, ti diambi RTM sama enggau ngaga dokumentari nya di Sarawak.
Ku Mabong, ngarapka krew filem ulih ngaga filem ba sekeda endur baka Palan Jelu Siga Matang, enggau ‘homestays’ di Singai Bau nyengkaum bekaul enggau muzik Taboh Kuntau di Akademi Sadia.
Dermaga diarika produser filem Rizal Busu sereta direktor enggau penulis skrip Deen Salih.
Sama bisi ngulu aum nya, Ketuai Nembiak SDNU Churchill Edward Drem, ti mega nyadi protem chairman NIKA.
Dokumentari ti diberi nama ‘Gelanggang’ deka mantaika 13 episod lalu tetiap iti episod nya dalam 30 minit.
Konsep tetiap iti episod nya mayuh mandangka drama belaban lalu orang ke nyadi juruachara nya deka nusui peneleba iya belajar tetiap iti bungai kuntau ari guro.
Dokumentari nya deka mandangka randau enggau tuai tauka guro sesebengkah bungai kuntau.
Nitihka jaku Deen, siri nya enda ngaul sebarang pekara bekaul enggau bansa, pengarap sereta pekara ke ditagang.
Nya semina mandangka pelasar singkang tetiap bungai kuntau ke digaga komuniti tauka seraban etnik.
Kelimpah ari Kuntau Iban, kuntau bukai ke sama deka dipandangka dalam siri bukai, iya nya Harimau Berantai, Kalaripayat, Bangau Putih, Kung Fu Wing Chun, Muay Thai, Jiu Jitsu, Shaolin Wahnam, Silambam, Buah Pukul Gayang Lima, Pelaga Siku 12, Cemara Bugis, Hulubalang Melaka, Lintau Asli, Gerak Lian enggau Sendeng Haji Hamid.
Batang tuju mantaika dokumentari tu ukai semina deka ngangkatka seni tauka main asal tu tang deka matak mayuh agi nembiak ti bisi pengerindu ba kuntau.
Iya mega betuju deka mandangka Malaysia tu sebuah menua ke bepengeraja dalam adat pesaka.