MIRI: Raban profesional Orang Ulu deka ngatur seminar ‘Ngenegapka Pekara Ekonomi Dagang-Betanam Betupi’ berengkah 18 ngagai 19 March ba Maranatha Hall di Merdeka Mall.
Pengari pengatur, Francis Nyurang madah program seminar tu asil ari langgur penemu seiku Orang Ulu ti tegap ba pengawa dagang iya nya, Dr. Francis Jana.
Iya seiku orang ti rindu mantu sereta nyaup komuniti Orang Ulu dalam pengawa dagang betanamka asil komoditi dalam timpuh pandak baka lia, nanas enggau lada.
“Seminar dua hari berunggu tu ila deka ngaul bala speaker ari mayuh bengkah opis perintah alai sekeda ari sida datai ari Kaunsil Industri Nanas sereta mega Opis Betanam Betupi,” ku Francis.
Seminar tu mega deka ngaul pekara ngerembaika makit dagang.
Ku Francis nampung, piak pengatur nagit 200 ngagai 250 iku pesereta ngulu seminar tu.
“Tu keterubah iya kami ngatur seminar baka tu, nya alai iya bisi tatak. Balai tu semina ulih nampung urung 250 iku pesereta,” ku iya.
Iya madahka seminar tu tebuka ngagai semua peranak Orang Ulu tang nyemetak madah semina sida ti bebendar deka ngaul diri dalam dagang asil komoditi aja diperansang datai.
Bayar panjar nyereta seminar RM100 ungkup seiku lalu haribulan kepenudi ngerejista diri kena 17 Febuari tu.
Ngagai mensia mayuh ke bisi ati deka enggau ngulu seminar tu, tau betelefon terus nuju Dr. Francis Jana ba lumur 019-8251511, Francis (019-8848002) tauka Jeffery Wei (0198859315).