KUCHING: Barisan Nasional (BN) ulih ngetanka parlimen Sri Aman ba pengawa bepilih besai ke-13 (PRU13) ila
Nitihku Presiden Parti Rayat Sarawak (PRS) Tan Sri Dr James Masing, BN ulih nyapai juluk nya teulihka mayuh undi lebih bepelasarka pengawa bepilih nengeri (PRN) ba tiga bengkah sitak; Balai Ringin, Bukit Begunan enggau Simanggang.
Sitak Sri Aman diatu dipangku Masir Kujat ari PRS, iya nya sebengkah sitak ke diungkup ari enam Parlimen ngagai parti.
“Amat, kami ulih menang ba sitak nya maya PRU13 ila,” ku iya madah nengah pesan jaku pandak (SMS).
Iya ke mega nyadi Menteri Pemansang Tanah maya nyaut tanya ti madahka sitak nya mayuh diining ari parti bukai kelebih agi penyakal, madah nya siti ari kebuah BN ulih menang sereta ngetanka penuduk nya.
Taja pan pia, masing madah sida (parti) enda diau diri tang majak gawa ngambika ulih ngetanka penuduk nya penggi BN.
Leon Jimat ari Democratic Action Party (DAP) dipelabaka chalun ke dikemendarka sekretari parti Lim Guan Eng, lalu pia mega Sarawak Workers’ Party (SWP), sama ngining penuduk nya ti tau bendar nyadika ‘munsuh’ berebut enggau PRS.
Kededua parti sama udah bejalaika kimpin sida ba sitak nya.
Berita kepenudi iya nya menijar besai Sarawak Forestry Corporation (SFC) ke suba Wilfred Landong, ke udah masuk Parti Keadilan Rakyat (PKR) mega bisi nerantangka pengingin ati diri bediri ba sitak nya.
Taja pia, Sekretari Besai PRS Datuk Wilfred Nissom lebuh ke dikerandau madah parti udah nyikap diri ngelaban penyakal maya PRU13 ila.