KUCHING: Biro Ekonomi Nembiak PBB Sarawak Abdul Aziz Adenan ngenataika tanya sekalika penerbai Fireflyz ba Kuching enggau Sibu deka diketu tauka enda.
Iya madahka sepengudah dua bulan penerang ke dipansutka alai raban pengatur kereja betuaika Sir Tony Fernandez AirAsia udah ngambi tanggungpengawa bejalaika atur kereja MAS.
“Kami deka ngenataika tanya ngagai Sir Tony Fernandez sekalika atur kereja MAS ke dikuasa iya deka ngetuka penerbai Fireflyz ba Kuching enggau Sibu.
“Aku bisi begulai enggau Yang Berhormat Datuk Amar Abang Johari Menteri Dagang Temuai Sarawak sereta gerempung Dagang Temuai BIMP-EAGA irau ke pengawa besilih saham entara AirAsia enggau MAS,” ku iya nengah penerang berita ditu, kemari.
Ku iya, Sapit Menteri Dagang Temuai Malaysia Datuk Dr James Dawos Mamit mega bisi udah madah dalam surat kabar jaku English menua tu alai penerbai bilun ke kurang entara kebuah Sarawak kurang nerima penatai orang dagang temuai ari menua luar.
Iya madahka sekalika Sir Tony Fernandez meri perintah ngagai atur kereja MAS nutup penerbai Fireflyz ba Sarawak lalu ngungkupka kompeni penerbai ke diempu iya AirAsia bejalaika dagang penerbai ungkus mit tu?
“Enti amat Fireflyz diasuh ngetuka penerbai bilun sida iya ba Sarawak, tu ukai semina ngurangka penatai temuai tang mega ngujungka rayat menua Sarawak ke ngembuan penatai pemisi ke mit meli tikit AirAsia. Aku arap Sir Tony Fernandez ulih meri penerang senentang pekara tu,” ku iya.