KUALA LUMPUR: Bisi 472,900 iti laptop tauka komputer binching 1Malaysia bekenaka ungkus penyampau RM470 miliun udah diberi ngagai nembiak sekula di serata menua di baruh renggat satu enggau dua program nya.
Sapit Menteri Pemadah, Penyambung enggau Main Asal Datuk Joseph Salang Gandum madahka semua penyampau laptop ke diungkupka nengah program nya sejuta unit.
“Bepelasarka anggar ke digaga, inisiatif tu meri ngagai 15 persin tembus arus pemesai menua,” ku iya lebuh ti nyaut tanya Senator Pau Chiong Ung ba aum Dewan Negara ditu bedau lama ke udah.
Pau deka nemu penyampau belanja enggau pemayuh komputer binching 1Malaysia ke udah diagih ngagai nembiak sekula.
Nyaut tanya tambah Pau bekaul enggau tikas kualiti komputer binching di baruh program tu, Salang madahka semua pembekal aruh nitihka Prosedur Operasi Standard (SOP) ke udah ditetapka oleh Komiti Penyambung enggau Multimedia Malaysia (SKMM).
“Taja pan mayuh komputer binching di baruh program tu ari mayuh bengkah jenama ke enda entu tebilang tang semua komputer binching nya udah diuji sereta diperesa pemanah ari SKMM dikena nyamin kualiti nya.
“Kompeni ke mujur nyadung komputer binching nya aruh nyendiaka palan servis di genap endur ke bisi masuk dalam program tu ngambika ulih napi sebarang penanggul bekaul enggau pengawa bekenaka komputer bincing nya,” ku iya. — Bernama