SIBU: Gerempung Penulis Iban Sarawak (SIWA) udah mujur bejadika bup Sempandai apin lama tu tadi. Bup nya udah berengkah dijual ba pun bulan Disember tu.
Pengawa bejadika bup nya diatur Penyanding Penemu ke lalu nyadi Kaban Kunsil Nengeri (ADUN) Tamin, Jospeh Mauh Ikeh.
Sama bisi datai ngulu pengerami nya Chairman SIWA, Harry Usup Umbar; Sapit Chairman SIWA, William Baja Jap; kaban Komiti SIWA, tuai raban bansa, Tuai Rumah kaum enggau temuai ke bukai.
Pengerami bejadika bup nya mega sama dikeramika ari raban SIWA ti mansangka pengelandik diri bekaraoke, bejualka bup bacha ke dikarang enggau dibaruh pegai SIWA.
“Bup Sempandai dikeluarka dua bulan sekali ngundan enam segmen ke bebatang iya nya Sada Rayat, Ruai Litericha, Pantar Ekonomi, Pelajar Sekula, Ruang Bilik enggau Laman Daya Idup”, ku Mauh.
Mauh ba jaku pandak iya ngarapka raban bansa kelebih agi bansa Iban ulih meri sukung ba pengawa ngaga bup Sempandai ti meri tuju dikena mantaika penemu, peneleba enggau pengelandik kemaya hari tu.
Kelimpah enggau nya, Mauh mega andal bendar meda pengawa ngaga bup nya ulih ngangkatka jaku Iban sereta ngarapka pemansut bup Sempandai tu mansang baka bup bacha ari jaku bansa bukai.