Pengeruh ke patut diputar ngena jalai subuk sereta siru enda munyi ke disadang, baka pisa majak nguyum
KUCHING: Parti Rakyat Sarawak (PRS) dilalau mutarka penyarut enggau naka penyiru entara mandal presiden parti nya Datuk Joseph Salang ke mega kaban parlimen Julau enggau mandal presiden SPDP ke mega kaban kunsil nengeri (ADUN) Meluan, Wong Judat.
Presiden SPDP Tan Sri William Mawan kemari enggau baruh penemu minta PRS ngemeratka penyerakup kaban parti dalam BN nyerumba pengawa bepilih besai ti deka datai tu.
PRS enda tau ngaku diri siru penemu enti meruan bisi kaul enggau kaban parti SPDP ke ditingkil ari parti (dikumbai G5) ngutuk SPDP sereta bepejahka presiden sereta aruh bejalaika tinggang atur ke patut ba Wong ke dikumbai nyaup parti ke baru nyumbuk, Sarawak Workers Party (SWP), ku Mawan.
Mawan madah, “Penyarut ba Julau berindik ari penemu ke enda senutuk entara MP enggau kaban kunsil nengeri nya. Penyaru penemu nya ukai pekara ke baru.”
“Taja pia, SPDP nadai runding ngemaruhka kaban ari gempung Barisan Nasional (BN). Minggu nyin kemari aku madahka diri deka besemuka enggau PRS tang sida nadai berenggut deka berandau enggau aku.
“Ari ke ngelaban SWP, munsuh BN, sida (PRS) ngaul G5 bejaika parti enggau presiden ba mua mensia mayuh. Nyata bendar sida (PRS enggau G5) semina rindu ngeruh ai ari ke ngasuh chiru.
“Enti nitihka patut sida (PRS) patut ngemeratka kaul sereta penegap dalam BN lebih agi ba Julau. SPDP kaban BN. PRS aruh bendar ngaul SPDP. SPDP nadai ngaul SWP laban parti nya ukai kaban BN.
“Aku ngarapka pemereti runding. Ni pemayuh penemu ke dipansut ba surat berita enda deka mutarka penyarut. Uji kitai nengah jalai pemaik. Nadai penyarut enda alah putar.”
Ngenang Wilson Nyabong ke nyaran ngambika SPDP ngemanahka ulah Wong, Mawan setuju enggau penemu nya. SPDP bisi atur dikena mutarka penanggul nya.
“Enti Wong ditemu ngelui ke patut, SPDP bisi atur dikena mansik sereta ngenukuka penyarut nya. Tang enti penyarut nya bepun ari penyaru seduai ke lama, enda ga ulih kitai madahka tengut nya lilih ngagai pekara parti,” ku Mawan
Ngelama ke tu, PRS enggau SPDP ngembuan kaul ke tegap ba renggat redak rama.
Wong mega madah, iya nadai penyarut enggau SPDP tang bisi saru penemu enggau Salang.
Lebuh ngenang penemu Nyabong ke madahka semina kaban parti dalam BN aja ngemendarka chalun maya pengawa bepilih, nya endang pekara ke patut.
Mawan bejaku munyi nya lebuh ngerimbas raban G5 ke minta MP Mas Gading ke nadai beparti bediri ba sitak nya ngarika BN terang bendar melakangka SPDP.
Dr Tiki seiku ari lima kaban parti ditingkilka ari SPDP berindik ari ulah ke tau ngeruga penegap dalam parti.
Empai lama ti udah Nyabong ke mega sekretari politik Kepala Menteri madah ngagai sebengkah suratberita, iya nya Wong enda ulih melabaka sapa patut ngarika BN ba sitak Julau laban PRS ngembuan kuasa ba atur nya.